Швейсарияда 34 йил аввал йўқолган икки алпинист жасади топилди

Швейсарияда 34 йил аввал ғойиб бўлган икки алпинистнинг жасадлари топилди. Бу ҳақда СБС Невс хабар берди.

Вале кантони полициясининг маълумотларига кўра, икки эркакнинг жасади сайёҳ томонидан аниқланган. Улар Трифт музлигининг эриши натижасида юзага чиққан. Ўтказилган ДНК таҳлили жасадларнинг 1992-йилдан бери Вайсмис ҳудудида бедарак йўқолган алпинистларга тегишли эканлигини тасдиқлади.

Марҳумлар Белгия фуқаролари бўлиб, йўқолган вақтда 39 ва 41 ёшда бўлганлар. Кантон полицияси 1925-йилдан бери бедарак йўқолганлар рўйхатини юритади. Бу рўйхат асосан баланд тоғларда ёки сув ҳавзаларида ғойиб бўлган шахсларни ўз ичига олади.

Полиция таъкидлашича, "музликларнинг эриши натижасида баъзан бир неча ўн йиллар олдин тоғларда йўқолган одамларнинг қолдиқлари топилади".

Швейсарияда июл ойи метеорологик кузатувлар тарихидаги энг иссиқ ой бўлди. Бу ҳолат дарё ва кўлларда сув сатҳининг сезиларли даражада пасайишига ҳамда музликларнинг эришининг тезлашишига олиб келди.

Аввалроқ Эверест тоғида қарийб 30 йилдан буён қолиб кетган ва алпинистлар орасида "Яшил этик" (Греен Бооц) номи билан машҳур бўлган алпинистнинг жасадини тоғдан олиб тушириш бўйича хавфли операция бошланганди. Қарийб 10 йил давомида унинг ёрқин яшил этиклари Эверестга чиқаётган алпинистлар учун муҳим мўлжал вазифасини ўтаб келган. Кўплаб алпинистлар айнан шу нуқтага етганидан сўнг базавий лагерга радио орқали кейинги босқични босиб ўтганини маълум қилган.