Шри Ланкада археологлар Будданинг 17 та олтин ҳайкалини қазиб олди
Шри-Ланкалик археологлар ЮНЕСКОнинг Бутунжаҳон мероси рўйхатига киритилган ҳудудда 17 та олтин билан қопланган Будда ҳайкалини топдилар. Бу жой 2 минг йилдан кўпроқ вақт олдин ибодатхона бўлган деб тахмин қилинмоқда.
Ушбу ноёб топилма қадимий пойтахт Анурадҳапурадаги Абҳаягири ибодатхонаси мажмуаси деворида олиб борилган қазишмалар чоғида аниқланди. Ҳукуматнинг Марказий маданият жамғармаси вакили Тусита Ҳератнинг сўзларига кўра, бу сўнгги 30 йилдан ортиқ вақт ичида ушбу ҳудудда топилган энг қимматли топилмадир.
Унинг таъкидлашича, мутахассислар илгари ҳам қадимий буюмларни топганлар, аммо бундай кўп миқдордаги ҳайкаллар биринчи марта учрамоқда. Олтин суви юритилган 17 та бронза ҳайкал ВИИ ва ВИИИ асрларга оид экспонатларга ўхшаш хусусиятларга эга бўлиб, уларнинг ёши тахминан 1200–1300 йилга тенг деб баҳоланмоқда.
Топилмалар устида қўшимча текширувлар олиб борилмоқда. Расмийлар уларни тахминан бир ой ичида жамоатчиликка намойиш этишни режалаштирмоқда.
Ҳайкаллар 1982-йилдан бери ЮНЕСКО Бутунжаҳон мероси рўйхатига киритилган Анурадҳапура муқаддас шаҳри ҳудудида турли жойларда кўмилган ҳолда топилган. Халқаро тан олинишидан сўнг, Шри-Ланка Марказий маданият жамғармаси бу ерда қазиш ишларини бошлаган.
Бу ҳудуд Буддизмнинг Теравада, Маҳаяна ва Важраяна таълимотларини ўзида мужассам этгани билан машҳур. Юзлаб йиллар аввал бу ер Хитой ва Ҳиндистондан келган олимлар ва зиёратчиларни ўзига жалб қилган.