Шахмат. Магнус Карлсен Эспорц Ворлд Суп турнирида ғолиб бўлди
Шахмат бўйича дунёнинг биринчи рақамли ўйинчиси Магнус Карлсен Парижда бўлиб ўтган 2026-йилги Эспорц Ворлд Суп турнирида ғолибликни қўлга киритди. Финалда у 19 ёшли беларуслик гроссмейстер Денис Лазавикни мағлуб этди. Карлсен мусобақани гуруҳ босқичидан бошлаб плей-оффгача бирорта ҳам партияда мағлуб бўлмасдан якунлади.
Теам Лиқуид жамоаси сафида иштирок этган Карлсен Лазавикни ишончли тарзда мағлубиятга учратди, ҳар икки сетда 3:1 ҳисобида устун келди.
Киберспорт бўйича Жаҳон чемпионатидаги ғалабадан сўнг, норвегиялик гроссмейстер шундай деди: “Мен Дениснинг ўйинларини кузатдим ва мураббийлар билан гаплашдим. Айниқса, Ҳикару қўллаган ёндашув тўғри бўлмаганини ҳис қилдим. Қизиғи шундаки, мен унинг эндшпилларда ҳимояланиши унчалик кучли эмаслигини айтгандим. Шунинг учун Ҳикару каби хатога йўл қўймасдан, вазиятни яхшироқ ушлаб туришим керак деб ўйладим”.
Карлсен Лазавик билан аввалги ўйинларда йўл қўйган хатоларини ҳам эслаб ўтди: “Мен Денис билан интернетда кўп марта ўйнаганман. Ўша ўйинларда таваккал қилиб, бунинг учун жазоланганман. Шу сабабли унга аниқ позицион устунлик беришга ҳаракат қилмадим”.
Турнир давомида Карлсен чоракфиналда ҳиндистонлик гроссмейстер Ниҳал Саринни 2,5:0,5 ҳисобида, яримфиналда эса франсиялик шахматчи Алиреза Фирузжани 4:1 ҳисобида мағлуб этди.
Карлсендан мағлубиятга учраши мумкинлигини ҳис қилган пайтлари бўлган-бўлмаганини сўрашганда, у шундай жавоб берди: “Албатта, шундай вазиятлар бўлди. Алирезага қарши бир неча бор, Ниҳалга қарши ҳам шундай ҳолатлар юзага келди. Айрим хавфли вазиятлар бўлган, аммо турнирни мағлубияциз якунлаганимдан жуда хурсандман. Мен ноодатий нарса қилишга уринмадим. Имкониятлардан фойдаланишга, бироз таваккал қилишга ҳаракат қилдим ва бундан мамнунман”.
Маълумот учун, ушбу мусобақада НАВИ (Натус Винсере) жамоаси номидан иштирок этган Ўзбекистоннинг иккинчи рақамли гроссмейстери Нодирбек Абдусатторов чоракфиналда Денис Лазавик билан баҳс олиб борди. Дастлабки тўртта партияда ғолиб номи аниқланмади. Шундан сўнг, армаггедон баҳсида Лазавик ғалаба қозонди ва кейинги босқичга йўл олди. Ўзбекистонлик шахматчи бу турнирдаги натижаси эвазига 75 минг доллар пул мукофотини қўлга киритди.
Шахматчилар турнирда “10+0” яъни рапид форматида баҳслашди. Турнирнинг соврин жамғармаси 1,5 миллион АҚШ долларини ташкил этди ва ғолиб 250 минг долларга эга бўлди. Карлсен 2025-йилги Эспорц Ворлд Суп мусобақасида ҳам бош совринни қўлга киритган эди.