Шавкат Мирзиёев Хитой ва Непал раҳбарларига ҳамдардлик билдирди
Ушбу ҳодиса сабаб Хитой ва Непалда 160 дан ошиқ киши ҳалок бўлди.
Шавкат Мирзиёев Хитой ва Непал раҳбарларига ҳамдардлик билдирди.
Ўзбекистон Республикаси Президенти Шавкат Мирзиёев Хитой Халқ Республикаси Раиси Си Сзинпингга Тибет автоном раёнининг Шигадзе шаҳар округида рўй берган кенг кўламли кўчки ва сув тошқинлари туфайли кўплаб инсонларнинг ҳаётдан кўз юмгани, жароҳатлангани ҳамда улкан иқтисодий зарар етказилгани муносабати билан чуқур ҳамдардлик изҳор этди.
Давлатимиз раҳбари ҳалок бўлганларнинг оила аъзолари ва яқинларига сабр-тоқат тилаб, жароҳат олганларнинг тез фурсатда соғайиб кетишини ният қилди.
Шунингдек, Шавкат Мирзиёев Непал Президенти Рам Чандра Пауделга ҳам Тибет билан чегарадош ҳудудларда юз берган кучли сув тошқинлари оқибатида кўплаб инсонларнинг қурбон бўлгани, жароҳатлангани ва катта миқдордаги талафотлар кўрилгани муносабати билан ҳамдардлик йўллади.
Маълумот ўрнида, Непал ва Хитойда содир бўлган ушбу тошқинларда 160 нафардан зиёд киши ҳалок бўлган, юзлаб инсонлар эса бедарак йўқолган.