Шавкат Мирзиёев Жоржа Мелонини Италияда энг узоқ фаолият юритган бош вазир бўлгани билан табриклади
Шавкат Мирзиёев Италия бош вазири Жоржа Мелонига мактуб йўллаб, уни мамлакат тарихида энг узоқ муддат фаолият юритган ҳукумат раҳбарига айлангани билан табриклади. Президент бу натижа Италия халқининг Мелонига бўлган юксак ишончи ва унинг сиёсий иродаси тасдиғи эканини таъкидлади.
Шавкат Мирзиёев Жоржа Мелонини Италияда энг узоқ фаолият юритган бош вазир бўлгани билан табриклади
Шавкат Мирзиёев Италия Вазирлар Кенгаши раиси Жоржа Мелонига мактуб йўллаб, уни шу лавозимда ҳозиргача энг узоқ муддат ишлаган ҳукумат раҳбари сифатида тарихга киргани билан табриклади, дея хабар бермоқда президент матбуот хизмати.
Ўзбекистон раҳбари мактубида ҳозирги мураккаб халқаро вазиятда Италия миллий манфаатларини ҳимоя қилиш ҳамда мамлакатнинг Европа Иттифоқи ва жаҳон майдонидаги нуфузини ошириш йўлидаги саъй-ҳаракатларни алоҳида қайд этди.
Шавкат Мирзиёев Италия ҳукумат раҳбарига Ўзбекистонга нисбатан дўстона муносабати ва икки томонлама ҳамкорликни кенгайтиришга қаратаётган эътибори учун миннатдорлик билдирди.
“Ўзбекистон Италия билан ўрнатилган стратегик шериклик муносабатларини юксак қадрлаши таъкидланди. Бугунги кунда сиёсий мулоқот, савдо-иқтисодий ва инвестициявий ҳамкорлик, маданий-гуманитар алоқалар тобора сермазмун тус олиб, икки томонлама муносабатлар сифат жиҳатидан янги босқичга кўтарилаётгани мамнуният билан қайд этилди”, — дейилади хабарда.
Президент Италия бош вазири Жоржа Мелони билан сўнгги бор шу йил январ ойида у Тошкентда тўхтаб ўтганида учрашганди.
Мелони Ўзбекистонга расмий ташриф билан 2025-йил май ойида келган.
Маълумот учун, Жоржа Мелони 2022-йил 22-октабрда Италия Вазирлар Кенгаши раиси (бош вазир) лавозимига қасамёд келтирган ва мамлакат тарихида ушбу лавозимни эгаллаган илк аёл сиёсатчига айланган.
Мелони, шунингдек, 2014-йилдан буён ўнг марказчи “Италия биродарлари” (Фрателли дъИталиа) партиясига раҳбарлик қилиб келади. Ҳукуматлар тез-тез алмашиб турадиган Италия тарихида унинг Вазирлар Кенгаши энг узоқ вақт узлуксиз фаолият юритаётган ҳукумат сифатида рекорд ўрнатди.
У Инстаграм саҳифасида бу барқарорлик бир кишининг хизмати эмас, балки умумий қарашларга эга бўлган аҳил коалициянинг натижаси эканини ёзди.
“Бу йиллар давомида биз бандликни ошириш, ишсизликни камайтириш, оилалар ва бизнесни қўллаб-қувватлаш, хавфсизликни мустаҳкамлаш ҳамда Италиянинг халқаро майдондаги обрўсини қайтариш йўлида меҳнат қилдик. Натижалар бор, аммо ҳали қилиниши керак бўлган ишлар жуда кўплигини яхши биламиз”, — дея қайд этди у.
Жоржа Мелони ушбу барқарорлик 2022-йилда уларга ишонч билдирган италияликлар туфайли мавжудлигини, олдинда эса вазминлик ва келажакка ишончли нигоҳ билан меҳнатни давом эттиришларини қўшимча қилди.