Шавкат Мирзиёев «Ҳайдар Алиев» ордени билан тақдирланди

Шавкат Мирзиёевга "Ҳайдар Алиев" ордени топширилди

Кўксарой қароргоҳида Ўзбекистон ва Озарбойжон президентлари ўзаро олий давлат мукофотлари билан тақдирланди.

Озарбойжон Президенти Илҳом Алиевга Ўзбекистон Республикасининг энг юқори давлат мукофоти – "Олий Даражали Дўстлик" ордени топширилди.

Ўзбекистон раҳбари ушбу нуфузли мукофотни топширар экан, бу қарор Озарбойжон Президентининг икки қардош мамлакат ўртасидаги дўстлик, стратегик шериклик ва иттифоқчилик алоқаларини мустаҳкамлашдаги хизматларига Ўзбекистон халқининг самимий ҳурмати ва эътирофини ифодалашини таъкидлади.

"Сиз улуғ отангиз – атоқли давлат арбоби Ҳайдар Алиевнинг ишини муносиб давом эттирмоқдасиз. Сизнинг раҳбарлигингиздаги оқилона ислоҳотлар туфайли Озарбойжон тараққиёт борасида ва халқаро майдонда улкан ютуқларга эришмоқда", – деди Шавкат Мирзиёев.

Илҳом Алиевнинг Ўзбекистон-Озарбойжон кўп қиррали муносабатларини кенгайтиришга қўшаётган ҳиссаси ҳам алоҳида мамнуният билан қайд этилди. Икки давлат ўртасида иттифоқчилик муносабатлари қарор топишида айнан унинг ўрни беқиёс эканлиги таъкидланди.

Ўз навбатида, Озарбойжон Президенти юксак эътироф учун Ўзбекистон етакчиси ва халқига миннатдорлик билдирди ҳамда дўстлик ва ўзаро ҳурмат руҳидаги ҳар томонлама ҳамкорлик янада мустаҳкамланишига ишонч билдирди.

Шундан сўнг Ўзбекистон Президенти Шавкат Мирзиёев Озарбойжоннинг олий давлат мукофоти – "Ҳайдар Алиев" ордени билан тақдирланди.

Мукофотни давлат раҳбарига Озарбойжон Президенти Илҳом Алиев топширди.

Ўзбекистон етакчиси Озарбойжон Президенти ва қардош Озарбойжон халқига чуқур миннатдорлик билдириб, ушбу мукофотни абадий дўстлик, стратегик шериклик ва иттифоқчилик муносабатларини мустаҳкамлаш йўлидаги қўшма саъй-ҳаракатларга берилган юксак баҳо сифатида қабул қилишини таъкидлади.

"Мазкур орден мен учун алоҳида аҳамиятга эга. Унга бутун умрини Ватанига хизмат қилишга бағишлаган улуғ давлат арбоби Ҳайдар Алиевич Алиевнинг номи берилган. Айнан шу инсон Озарбойжоннинг келгуси тараққиёти учун мустаҳкам пойдевор яратди", – деди Шавкат Мирзиёев.

Ҳайдар Алиев Ўзбекистон тарихи ва маданиятини юксак қадрлагани, икки халқ яқинлашувига салмоқли ҳисса қўшгани таъкидланди.

Ўзбекистон ва Озарбойжон келгусида ҳам барча соҳаларда ҳамкорликни кенгайтириб, қардошлик муносабатлари эса янги амалий мазмун билан бойиб боришига ишонч билдирилди.

"Ҳайдар Алиев" орденига турли йилларда Франсия Президенти Жак Ширак, Қувайт Амири Сабоҳ ас-Сабоҳ, Туркия Президенти Ражаб Тоййиб Эрдўған, Италия Президенти Сержо Маттарелла ва бошқа кўплаб давлат арбоблари сазовор бўлган.