“Шармандали маҳалла” ташаббускори ва Тошкентдаги энг баланд бинога чиқиш рекорди - маҳаллий дайжест

**"Шармандали маҳалла" ташаббуси ва Тошкентдаги энг баланд бинога чиқиш рекорди – маҳаллий дайжест**

Бугунги дайжестимизда "Шармандали маҳалла" ва "Уятли хонадон" ташаббусининг ҳокимга тегишли экани, Тошкентдаги энг баланд бинога пиёда 9 дақиқада чиқилгани, давлат ташкилотларида ўзбек тилига риоя этиш назоратининг кучайтирилиши ҳамда Қашқадарёда Амир Темур музей-ёдгорлик мажмуаси қурилиши ҳақидаги муҳим янгиликлар билан таништирамиз.

**"Шармандали маҳалла" ва "Уятли хонадон" ташаббуси ҳокимники экани маълум бўлди**

Тошкент вилояти Чиноз туманида ободонлаштирилмаган маҳаллаларга "Шармандали маҳалла", яхши қаралмаган уйларга эса "Уятли хонадон" баннерлари осилиши ташаббуси туман ҳокими Шерзод Солиҳовга тегишли экани аниқланди.

Ҳокимнинг сўзларига кўра, бу борада унга ҳеч ким топшириқ бермаган, бу амалиёт ҳеч қайси маҳаллада жорий этилмаган, фақат ижтимоий тармоққа чиқариш учун видеога олинган.

Солиҳов ўз ташаббусидан мақсад "халқни уйғотиб, ободонлаштиришга чорлаш" бўлганини таъкидлаб, ҳамма хато қилишини айтган ва айби бўлса, узр сўрашини билдирган.

**Тошкентдаги энг баланд бинога пиёда 9 дақиқада чиқилди**

Пойтахт Фавқулодда вазиятлар бош бошқармаси томонидан ўтказилган махсус экспериментда қутқарувчи Нест Оне биносининг зиналаридан пиёда энг юқори қаватга кўтарилиш вақтини намойиш этди.

Маълум бўлишича, қутқарувчи 51-қаватга чиқиш учун 9 дақиқа-ю 3 сония вақт сарфлаган. Фавқулодда вазиятлар бош бошқармаси бу натижани мазкур бинога пиёда кўтарилишда рекорд деб эълон қилиб, спортчи ва блогерларга чақирув ташлади.

**Давлат ташкилотларида ўзбек тилига риоя этиш назорати кучайтирилади**

Ўзбекистонда давлат органлари ва ташкилотларида давлат тилида иш юритишни самарали ташкил этиш ҳамда ўзбек тили қоидаларига риоя этилишини таъминлаш бўйича қўшимча чоралар белгиланди.

Давлат тили масалалари бўйича маслаҳатчилар қонунчилик ижросини назорат қилиб, ҳужжатлар, ташқи ёзувлар ва рекламаларнинг тил меъёрларига мувофиқлигини ўрганиб боради.

Маслаҳатчилар фаолиятини энди Вазирлар Маҳкамасининг Давлат тилини ривожлантириш департаменти мувофиқлаштиради ва услубий жиҳатдан бошқаради. Маслаҳатчилар тегишли ташкилот раҳбари томонидан Департамент билан келишилган ҳолда лавозимга тайинланади ва озод этилади.

Маслаҳатчиларнинг асосий вазифаларидан бири давлат тили, географик объектлар ва маънавий-маърифий соҳага оид қонунчилик талабларига риоя этилишини таъминлаш бўлади. Шунингдек, норматив-ҳуқуқий ҳужжатлар лойиҳаларини лингвистик экспертизадан ўтказиш чоралари кўрилади.

**Қашқадарёда Амир Темур музей-ёдгорлик мажмуаси қурилади**

Марказий Осиё тарихидаги буюк давлат арбоби Амир Темур шарафига у туғилган Қашқадарё вилояти Яккабоғ туманида музей-ёдгорлик мажмуаси барпо этилади.

Туман ҳокимлиги хабарига кўра, 7-август куни Фанлар академияси Темурийлар тарихи давлат музейи директори, тарих фанлари доктори Хуршид Файзиев ва бошқа бир гуруҳ мутахассислар мажмуа қурилиши учун таклиф этилаётган ҳудудни кўздан кечирган, лойиҳа консепсияси, меъморий ечимлари ва амалга ошириш механизмларини муҳокама қилган.

Лойиҳага кўра, мажмуа марказида Амир Темур ҳайкали ўрнатилади. Унинг атрофида музей, кутубхона, мадраса, меҳмонхона, ҳунармандчилик ва заргарлик дўконлари, миллий таомлар маскани, истироҳат боғлари, фавворалар ҳамда тарихий услубдаги бош кириш аркаси барпо этилади.