Сейсмик хавфсизликка оид қонунга ўзгартишлар киритилди
Қурилиш ва уй-жой коммунал хўжалиги соҳасида назорат қилиш инспексиясининг бинолар сейсмик хавфсизлигини назорат қилиш, электрон техник паспортларни шакллантириш ва зилзилабардошликни ошириш бўйича ваколатлари белгиланди. Шунингдек, шаҳарсозлик ҳужжатлари таркибига мастер-режа киритилмоқда.
Сейсмик хавфсизликка доир қонунга ўзгартиришлар киритилди
«Ўзбекистон Республикаси аҳолиси ва ҳудудининг сейсмик хавфсизлигини таъминлаш тўғрисида»ги қонунга киритилган ўзгартиш ва қўшимчаларга мувофиқ, Вазирлар Маҳкамаси ҳузуридаги мазкур инспексия қурилаётган бино ва иншоотларнинг сейсмик хавфсизлиги норматив ҳужжатлар талабларига мослигини назорат қилади.
Инспексия электрон техник паспортлар асосида биноларни сейсмик заифлиги бўйича таснифлаш, уларни инструментал-техник текширувдан ўтказиш ҳамда зилзилабардошлигини ошириш ишларида қатнашади.
Сейсмик фаол ҳудудларда қурилиши режалаштирилаётган ва инспексия назоратига кирувчи барча турдаги бино ва иншоотлар, шунингдек, кўп қаватли тураржойлар учун электрон техник паспортларни шакллантириш ҳам унинг ваколатига киради. Ушбу паспортларда биноларнинг сейсмик заифлигини баҳолаш учун зарур маълумотлар жамланади.
Бундан ташқари, инспексия янги қурилаётган биноларнинг зилзилабардошлигини таъминлаш ва мавжуд бино-иншоотларнинг зилзилабардошлигини ошириш учун зарур чораларни кўради.
Мастер-режа шаҳарсозлик ҳужжати сифатида белгиланмоқда
Ўзгартишларга кўра, мастер-режа ҳам шаҳарсозлик ҳужжатлари таркибига киритилмоқда.
Мастер-режа ҳудудлардаги аниқ муаммоларни бартараф этишга йўналтирилган, шаҳарсозлик, ижтимоий-иқтисодий, экологик ва бошқа лойиҳа ечимларини бирлаштирган ҳужжат сифатида таърифланган.
Қонун расмий эълон қилинган кундан бошлаб уч ой ўтгач кучга киради.