Сергелида тадбиркорлар электрсиз қолди. ҲЕТ буни қурувчи ишларни охиригача етказмагани билан изоҳлаяпти
Сергелидаги ер усти метроси остидаги дўконларда иш бошлаган тадбиркорлар электр энергиясидаги узилишлардан азият чекяпти. Улар ишлар тўхтаб қолгани сабаб ижара пулини тўлашда қийинчиликка дуч келишаётганини таъкидлашяпти. «Ҳудудий электр тармоқлари»нинг Kun.uzъга маълум қилишича, таъминотдаги узилишлар қурувчи ташкилотнинг ишларни тўлиқ якунламагани билан боғлиқ.
Сергелида тадбиркорлар электр таъминотисиз қолди. ҲЕТ бунга қурувчи ишларни якунига етказмагани сабаб бўлганини айтмоқда
Тошкентда бир қатор тадбиркорлар электр узилишларидан зарар кўряпти. Kun.uzъга мурожаат қилганларнинг айтишича, улар Сергели ва Янгиҳаёт бекатлари оралиғидаги ер усти метро йўли остида қурилган янги биноларда фаолият бошлаган. Бироқ қарийб икки ойдан бери электр билан боғлиқ муаммо ҳал этилмаяпти.
«Метро остидаги бинони ижарага олганмиз. Бу ерда «свет» муаммо бўляпти. Қарийб 2 ойдан бери узилишлар тугагани йўқ. Сергели ҳокимиятидан одамлар келиб, бир ҳафтада муаммони ҳал қилиб беришади, деб кетишганди. Бир ойдан ошиб кетди, лекин ҳеч қанақа ўзгариш бўлгани йўқ. Йўқ нарсага, шароитга ижара пули тўлаяпмиз. Яна ҳожатхона муаммоси ҳам бор», дейди тадбиркор.
Яна бир мурожаатчи кечқурун одамлар кўчага чиққанда ишлай олмасликларини, дўконлар ичи қоронғи бўлиб қолаётганини айтиб шикоят қилди.
«Бу ерда дўконлар кўп. Ҳамма квадрат метрига қараб ижара пули тўлайди. Шахсан мен 500 доллар тўлашим керак. Ҳозирги кунда «свет» йўқлиги учун шу пулни қаердан олсам экан, деб ўтирибман. Амалий ёрдам кўрсацангиз жуда ҳам хурсанд бўлардик», дейди тадбиркор.
«Қурилиш фирмаси дўконларни қураётганда вақтинча уларга электр энергияси бериб турилган. Бунда таъминот фақат қурилиш ишлари учун амалга оширилган. Обьектлар битганидан кейин қурувчи уларни бизга тайёр ҳолда топшириши керак. Яъни қурувчи қанча электр таъминоти кераклигини аниқлаштириб, инфраструктурани яратиб бериши керак. Шу иш қилинмаган. Аҳолига ажратилаётган электр энергиясидан уларга бера олмаймиз, тизим ортиқча босимни кўтармайди. Симларни қандай ва қаердан улаш муаммоси ҳам бор. Буларнинг ҳаммасини қурилиш фирмаси билан гаплашишимиз керак», дейилади расмий изоҳда.