"Сени ўлдираман, ҳеч ким топмайди". Россияда ўзбекистонлик эркак аёлларни қулликка ёллашда гумонланмоқда

"Сени ўлдираман, ҳеч ким топмайди". Россияда асли ўзбекистонлик эркак аёлларни қулликка ёллашда гумонланмоқда

Россиянинг Сургут шаҳрида илгари фаррош бўлиб ишлаган, пакана бўйли, асли ўзбекистонлик эркак атрофида можаро авж олди. Эркак ишга жойлаштиришда ёрдам бериш ниқоби остида Марказий Осиёлик муҳожир аёлларни қулликка жалб қилиш схемасини тузганликда гумон қилинмоқда.

"Травли нет" жамғармаси кўнгиллилари ва Baza Telegram-каналининг даъво қилишича, у бир неча йил давомида ижтимоий тармоқлар орқали бошқа одамларнинг суратларидан фойдаланиб, аёллар билан танишиб келган бўлиши мумкин. У ўзини миграция хизмати ходими сифатида таништириб, ватандош аёлларга расмий иш ва уй-жой ваъда қилган. Аммо Россияга келганларидан кейин қурбонларнинг ҳужжатлари олиб қўйилиб, улар амалда озодликдан маҳрум этилган.

Жабрланувчилардан бири Самарқандда туғилган 36 ёшли аёл бўлди. Унинг сўзларига кўра, у Сургутга ҳали 2016 йилда, интернетдаги танишига ишониб келган. Оқибатда эркак уни квартирага қамаб қўйган, паспортини олиб қўйган ва фаррошлик қилиб топган барча маошини ўзлаштирган. Бир неча йил давомида у аёлни қўрқувда ушлаб турган, интим суратлари билан шантаж қилган ва доимий равишда ўлдириш билан таҳдид қилган. Аёлнинг айтишича, хавфли кимса доимо ёстиғи тагида пичоқ сақлаган ва очиқчасига шундай деган:

"Сени ҳозир ўлдираман, сени ҳеч ким топмайди. Мен Россия фуқаросиман, менга ҳеч нарса қилишолмайди".

Қочишга бўлган уринишлардан бири у учун деразадан сакраганидан кейин қўли синиши билан якунланган.

Аёл Сургутдан фақат икки йил аввал кетишга муваффақ бўлди — унга кейинчалик эрига айланган ва уни Тюменга кўчириб ўтказган ҳамкасби ёрдам берди. Аммо шундан кейин ҳам шантаж ва товламачилик тўхтамади, ҳатто товламачига 1,7 минг доллар тўлангани ҳам ёрдам бермади.

Жабрланувчининг эри шантажчини жавобгарликка тортишга ҳаракат қилмоқда, бироқ Россия полицияси ҳозирча аризага йўл бермади. Идорадагилар можаронинг барча иштирокчилари сўроқ қилинганини ва аёлнинг сўзлари ўз тасдиғини топмаганини маълум қилиб, у илгари ҳуқуқ-тартибот идораларига мурожаат қилмагани, шу сабабли жиноят иши қўзғатиш рад этилганини қўшимча қилди.

"Полиция ходимлари томонидан ҳодисанинг барча иштирокчилари сўроқ қилинди. Қиз эълон қилган маълумотлар ўз тасдиғини топмади", – деб хабар берди полиция.

Эътиборлиси, эркакнинг ўзи ҳуқуқ-тартиботчилар томонидан сўроқ қилинаётганда аёлга ҳақиқатан ҳам таҳдид қилганини ва унинг яланғоч суратларини тармоққа жойлаштирганини тан олган. Бироқ ҳуқуқ-тартибот идоралари ходимлари унинг хатти-ҳаракатларида жиноят таркибини кўрмадилар ва жабрланувчи томонидан ўз вақтида ариза берилмаганини рўкач қилиб, жиноят иши қўзғатишни рад этдилар.

, шунингдек, июль ойида Ўзбекистон Миграция агентлигининг Москвадаги ваколатхонаси юзлаб меҳнат муҳожирларига ижтимоий, ҳуқуқий ва амалий ёрдам кўрсатгани маълум бўлди. Ватандошларга ватанга қайтиш, иш ҳақини ундириш, ҳужжатларни олиш ёки янги иш топишда ёрдам берилди.