Сенат Россияга қарши янги санксиялар пакети бўйича келишувга эришди
АҚШ Сенатида республикачи ва демократ сенаторлар Россия ва Эронга қарши янги санксиялар ҳақидаги қонун лойиҳасини қўллаб-қувватлаш бўйича келишувга эришди. Ҳужжат қабул қилинса, АҚШ президенти Доналд Трамп Россия нефти, гази ва уранини харид қилувчи давлатлардан импорт қилинадиган маҳсулотларга 100 фоизгача тариф жорий этиш ҳуқуқига эга бўлади.
Сенат Россияга қарши янги санксиялар пакетини келишиб олди
Блоомберг агентлигининг хабар беришича, Сенатдаги икки партия вакиллари Россия ва Эронга қарши янги санксияларни ўз ичига олган қонун лойиҳаси бўйича келишувга эришдилар.
Ушбу лойиҳа АҚШ президентига Россиядан импорт қилинадиган товарларга 500 фоизлик бож жорий этиш ваколатини беради. Шунингдек, Россия нефти, табиий гази ёки уранини сотиб оладиган, ёхуд Москвага амалдаги санксияларни четлаб ўтишда ёрдам берадиган мамлакатлардан импорт қилинадиган маҳсулотларга ҳам 100 фоизгача тариф белгилаш имконияти яратилади.
Ҳужжатга кўра, бу ваколатлар қонун кучга кирганидан кейин беш йил давомида амал қилади. Қонун лойиҳаси муаллифларидан бири яқинда вафот этган республикачи сенатор Линдси Грем эди.
Блоомберг таъкидлашича, бу ташаббус АҚШнинг Хитой ва Ҳиндистон билан савдо муносабатларига таъсир кўрсатиши мумкин, чунки бу икки давлат Россия энергетика ресурсларининг энг йирик харидорлари ҳисобланади. Шу сабабли айрим демократ сенаторлар президентга бундай кенг ваколатлар берилишидан хавотир билдирмоқда.
Қонун лойиҳаси шу ҳафтаёқ Сенатда қабул қилиниши мумкин, аммо у сентябрдан аввал кучга кирмайди, чунки АҚШ Конгрессининг қуйи палатаси – Вакиллар палатаси ёзги таътилга чиққан.
Доналд Трамп аввалроқ 2025 йилда тайёрланган ушбу қонун лойиҳасини қўллаб-қувватлашдан бош тортган эди. У Россия ва Эронга нисбатан санксияларни кучайтириш ёки юмшатиш бўйича президент ваколатларини янада кенгайтиришни талаб қилган. Бироқ Линдси Грем вафотидан кейин ва қонун лойиҳасига айрим ўзгартишлар киритилгач, Оқ уй бу ташаббусни қўллаб-қувватлашга қарор қилди.
Трамп маъмурияти аввал ҳам Россияни Украинадаги урушни тугатиш бўйича музокараларга ундаш мақсадида санксия босимини кучайтиришга уринган эди. Бироқ Эрон билан можаро пайтида Ҳўрмуз бўғози атрофидаги вазият кескинлашгач, жаҳон бозорида энергия нархларининг кескин ошиб кетишининг олдини олиш мақсадида Россия нефти билан боғлиқ айрим операцияларга нисбатан чекловлар вақтинча юмшатилган эди.