Саудия “Шарқ—Ғарб” нефт қувурини қайта ишга туширди

Саудия “Шарқ—Ғарб” нефт қувурини яна ишга туширди

Саудия Арабистони дрон ҳужумидан кейин “Шарқ—Ғарб” нефт қувурининг фаолияти қайта тикланганини билдирди. Реутерс манбаларга таяниб ёзишича, мамлакат 22-сентябр куни кечроқ Қизил денгиздаги Янбу портидан нефт экспортини давом эттириши мумкин.

Манбалардан иккисининг айтишича, қувур ҳозирча паст қувватда ишлаяпти. Саудия Арабистонининг давлат энергетика компанияси Сауди Арамсо бу ҳолат юзасидан ҳали изоҳ бермаган.

12-сентябр куни дронлар ҳужуми сабаб Саудия Арабистони “Шарқ—Ғарб” нефт қувурини тўхтатишга мажбур бўлган эди. Шу боис қиролликнинг Янбу портида хом нефтни кемаларга юклаш тўхтаб қолган.

Ҳужумлар қувурнинг Ар-Риёд ва Мадина ҳудудларидаги обьектларига қилинган. Саудия томони дронлар Ироқ ҳудудидан учирилганини маълум қилган, бироқ ҳужум ортида ким турганини ошкор этмаган. Бироқ АҚШ президенти Доналд Трамп Саудия нефт қувурига уюштирилган ҳужумда Эронни айблаган.

“Шарқ—Ғарб” қувурининг узунлиги қарийб 1200 километр бўлиб, Саудия нефтини Ҳормуз бўғозидан ўтказмасдан жаҳон бозорига олиб чиқишдаги асосий муқобил йўл ҳисобланади.

Кемалар ҳаракатини кузатувчи компаниялар ва таҳлилчилар ҳисоб-китобига кўра, сўнгги ойларда қувур орқали кунига 4–5 млн баррел нефт ташилган. Бу жаҳон нефт таъминотининг тахминан 4–5 фоизига тенг.

Ҳормуз бўғози АҚШ ва Исроилнинг Эронга зарбалари ортидан юзага келган можаро сабаб амалда ёпилган. Жаҳон нефт ва суюлтирилган табиий газ савдосининг қарийб бешдан бир қисми одатда шу йўналиш орқали ўтади. Шу сабаб Саудия сўнгги ойларда нефтни жаҳон бозорига чиқаришда Қизил денгиз йўналишига кўпроқ таяниб келаётган эди.