Саудия шаҳзодаси ФИФА президенти билан кўришишдан бош тортди (видео)
Саудия шаҳзодаси ФИФА президенти билан кўришишдан бош тортди (видео)
Парижда ўтказилган киберспорт бўйича Жаҳон чемпионатининг ёпилиш маросимида Саудия Арабистони валиаҳд шаҳзодаси ва бош вазири Муҳаммад бин Салмон ФИФА президенти Жанни Инфантино билан саломлашишни истамади.
СаудиНевс нашри томонидан эълон қилинган видеолавҳада қизиқ бир ҳолат акс этган. Париждаги “Гран-Пале” мажмуасида Муҳаммад бин Салмон Франсия президенти Эммануел Макрон билан бирга кетаётган вақтда, йўлида Жанни Инфантино ҳам учрайди. Макрон ФИФА раҳбарига яқинлашиб, у билан қўл бериб кўришади. Бироқ шаҳзода Инфантино билан кўришишни лозим топмай, уни айланиб ўтади ва тўғри португалиялик юлдуз Криштиану Роналду томон юради.
Бу совуқ муносабатнинг ўзига хос сабаблари бор. Аввалроқ ФИФА ўзининг “ФИФА Форвард Энтерприсе (ФФЕ)” номли шўба корхонасини ташкил этиб, унинг 25 фоиз улушини 4,2 миллиард долларга ташқи инвесторларга сотишни режалаштирган эди. Бунга жавобан УЕФА ва унга аъзо барча 55 та миллий федерация ФИФА байроғи остидаги мусобақаларни бойкот қилиш билан таҳдид қилди.
Қолаверса, УЕФА, КОНКАКАФ ва Осиё футбол конфедерацияси (ОФК) қўшма баёнот билан чиқиб, Инфантинонинг ҳаракатлари бўйича мустақил текширув ўтказишни талаб қилди. Конфедерациялар ФИФА раҳбарининг ушбу режасини ташкилот институтларига нисбатан “ишончни бутунлай поймол қилиш” деб баҳолашган. Гарчи ОФК бу масалада қолганлар билан бирдам эканини билдирган бўлса-да, ташкилотнинг айрим аъзолари (хусусан, Индонезия, Филиппин ва Қатар) Инфантинони қўллаб-қувватлаб чиққан эди.
Эътиборли жиҳати шундаки, ОФК аъзоси бўлган Саудия Арабистони 2034-йилги футбол бўйича Жаҳон чемпионатига мезбонлик қилиши кутилмоқда. Бу мундиал Осиё қитъасидаги учинчи (2002 ва 2022-йиллардан сўнг), Форс кўрфази мамлакатларида эса иккинчи Жаҳон чемпионати бўлади. Шундай йирик мусобақа арафасида мамлакат раҳбарияти ва ФИФА президенти ўртасидаги совуқ муносабатлар кўпчиликнинг эътиборини тортди.
Маълумот ўрнида, Жанни Инфантино 2016-йилдан буён ФИФАга раҳбарлик қилиб келмоқда ва келаси йилнинг март ойида бўлиб ўтадиган сайловда яна ўз номзодини илгари суриш ниятида эканини маълум қилган.