Саудия бош муфтийси ҳусийларга қарши курашда қурбонликка шай туришга чақирди

**Саудия бош муфтийси ҳусийларга қарши курашда қурбон бўлишга тайёр туришга чақирди**

Саудия Арабистонининг олий диний идораси мамлакат ҳарбийларини ҳусийларга қарши курашда жонини фидо қилишга тайёр бўлишга чақирди.

Саудия бош муфтийси Шайх Солиҳ бин Фавзон ал-Фавзоннинг мурожаати мамлакат чегараларида хизмат қилаётган ҳарбийларга қаратилган. Унда Қуръон оятлари ҳамда Муҳаммад (с.а.в) пайғамбарнинг Аллоҳ йўлида курашиш ва жон фидо қилиш ҳақидаги сўзлари келтирилган.

Бу мурожаат Саудия Арабистони ва ҳусийлар ўртасида бир неча ҳафтадан бери давом этаётган тўқнашувлар фонида эълон қилинди. Кузатувчилар Саудия Яман ҳукумати билан биргаликда кенг кўламли ҳарбий операция бошлаши мумкинми, деган саволни ўртага ташламоқда.

“Ушбу буюк миллатни ҳимоя қилиш... ва ҳудудининг ҳатто бир қаричига ҳам қўл узатмоқчи бўлган ҳар қандай кимсани жазолаш энг буюк бурчлар ва энг эзгу садоқат амалларидан бўлиб, бунинг учун Аллоҳнинг розилиги йўлида жон фидо қилиниши мумкин”, дейилади 25-сентябр куни кечқурун эълон қилинган баёнотда.

Яман ҳукумати икки ҳафта олдин Боб ал-Мандаб бўғози устидан назоратни ҳусийларга бой берди.

“Биз Қодир Аллоҳ таолодан сизга мадад беришни, мамлакатларимиз ва жонажон Яманимизни ҳар қандай бало-қазолардан асрашини сўраймиз. Шунингдек, ундан ҳусийлар, уларга ёрдам берувчи ва қўллаб-қувватловчиларни тўлиқ мағлубиятга учратишни сўраймиз”, дейилади баёнотда.

Саудия Арабистони 15-сентябр куни Макка шаҳри томон учирилган ҳусийлар дронини уриб туширди. Дрон муқаддас шаҳар устидаги тақиқланган ҳаво ҳудудига киришидан олдин йўқ қилинган. Яман ҳусийлари бу маълумотни рад этган.

“Сиз, фронтда хизмат қилаётган биродарлар, ўз бурчингизни бажаришга доимо шай туришингиз, ҳукмдорларга ва дала қўмондонларга бўйсунишингиз, буйруқларни ўта аниқлик билан бажаришингиз шарт”, дейилади баёнотда.

Саудия Арабистони июл ойида Эрон самолётининг Сана аеропортига қўнишига тўсқинлик қилганидан сўнг томонлар ўртасидаги зиддият кучайди. Самолётда Эроннинг собиқ олий раҳнамоси Оятуллоҳ Али Хоманаийнинг дафн маросимидан қайтаётган юқори мартабали ҳусий амалдорлар бўлган.

Шундан кейин ҳусийлар Қизил денгизда Саудия танкерларига ҳужум қилиб, қиролликнинг нефт экспорти йўналишига таҳдид солди. Сўнгги ҳафталарда улар порт шаҳри ва Боб ал-Мандаб бўғози яқинидаги оролларни эгаллаб олди.

Реутерс манбаларига кўра, Саудия Арабистони Хитойдан ҳусийларга таъсир ўтказишда ёрдам сўраган. Пекин эса уларни тийиб туриш учун Эронга босим ўтказган. Эрон минтақадаги барқарорлик АҚШ ва Исроилнинг Эронга қарши уруши тўхтатилишига боғлиқлигини билдирган.

Макка шартномаси аъзоси Покистон мажбуриятларини бажаришга тайёрлигини, Туркия эса Саудия Арабистони сўраса, ҳарбий ёрдам кўрсатишини маълум қилган. Манбаларга кўра, 17-сентябр куни валиаҳд шаҳзода Муҳаммад ибн Салмон АҚШ президентидан ёрдам сўраган. Трамп Пентагонга ҳаво ҳужумларига тайёргарлик кўришни буюрган, бироқ кейин қарорини бекор қилган. Шундан сўнг ҳусийлар Қизил денгизда АҚШ кемаларини нишонга олмаслигини билдирган.