Саудия Арабистони ҳусийларга қарши йирик ҳужум тайёрламоқда
Мақсад - Боб ал-Мандиб бўғози устидан назоратни қайтариш.
Саудия Арабистони ҳусийларга қарши катта ҳужумга ҳозирлик кўрмоқда
Саудия Арабистони яқин ҳафталарда Ямандаги Эрон томонидан қўллаб-қувватланадиган ҳусийларга қарши кенг кўламли ҳарбий операция бошлашни режалаштирмоқда. Асосий мақсад — исёнчиларни стратегик аҳамиятга эга Боб ал-Мандиб бўғозидан сиқиб чиқариш. Бу ҳақда 2-октабр куни Реутерс агентлиги Форс кўрфази давлатлари расмийлари ва Ғарб дипломатларига таяниб хабар берди.
Манбаларга кўра, ҳужумни Ар-Риёз назоратидаги Яман кучлари амалга оширади. Саудия авиацияси уларга ҳаводан ёрдам беради. Танланган кўламга қараб, бунга 100 мингдан ортиқ Яман ҳарбийлари жалб этилиши мумкин. Саудия Арабистони иттифоқчиларининг жанговар ҳаракатларда бевосита қатнашиши кутилмаяпти.
- Боб ал-Мандиб бўғози ҳудудида тор доирадаги зарба.
- Бир вақтнинг ўзида бир нечта фронтларда — Ал-Байда, Мариб, Таиз ва Ал-Жауф вилоятларида олиб бориладиган кенг кўламли ҳужум.
Саудия томони бўғоз ҳусийлар назорати остида экан, улар билан тинчлик музокараларига қайтиш ниятида эмаслигини маълум қилди.
Боб ал-Мандиб бўғози дунёдаги асосий денгиз йўлларидан бири ҳисобланади. Контейнер ташувларининг катта қисми ва денгиз орқали нефт ташишнинг қарийб 9 фоизи шу йўл орқали ўтади. Ҳормуз бўғозидаги вазият мураккаблашгач, Саудия Арабистони нефт экспорти учун Қизил денгиз йўналишидан фаолроқ фойдаланишни бошлади. Ҳусийлар назорати аллақачон транспорт оқимининг кескин камайишига, суғурта бадалларининг ошишига ва кемаларнинг Африка бўйлаб қайта йўналтирилишига олиб келди.
Саудия Арабистони ва ҳусийлар ўртасидаги можаро 2014-2015 йиллардан бери давом этмоқда. 2022-йилда бошланган нисбий хотиржамлик 2026-йил июл ойида кескин бузилди. Ҳусийлар Саудия Арабистони ҳудудини ўққа тутишни қайта бошлади ва Яманнинг ғарбий қирғоғида ҳужумга ўтди. Сентабр ойининг ўрталарига келиб, улар асосий нуқталарда, жумладан, Мохо тумани ва Перим оролида ўрнашиб олдилар ва Қизил денгизнинг жанубий кириш қисми устидан амалда назорат ўрнатдилар.