Сауди Арамсо биносига баллистик ракета тушди, АҚШ элчиси коррупсион можаро марказида – кун дайжести
Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Сауди Арамсо биносига баллистик ракета келиб тушди, АҚШ элчиси коррупсия можароси марказида — кун дайжести
Саудия Арабистони Энергетика вазирлиги 14-октабр куни маълум қилишича, Сауди Арамсо нефт компаниясининг Саудия шарқидаги Заҳрон шаҳрида жойлашган маъмурий биноси ҳужумга учраган.
Вазирлик баёнотига кўра, воқеа 13-октабр куни кечқурун юз берган, ҳужум натижасида чекланган миқёсда ёнғин чиққан, ҳалок бўлганлар ҳам, жароҳатланганлар ҳам йўқ. Реутерс компаниядаги манбасига таяниб ёзишича, Заҳрондаги Арамсо бош қароргоҳи мажмуасига баллистик ракета тушган. Бинонинг юқори уч қавати зарар кўрган.
Саудия Арабистони бощилигидаги коалиция Заҳронда уриб туширилган ракета бўлаклари турар жой ҳудудига тушганини билдирди. Ар-Риёдда ҳам ҳусийларнинг иккита ракетаси уриб туширилгач, уларнинг парчалари тушиши оқибатида тўрт киши жароҳатланган.
Ҳусийлар бир ҳафтадан бери Саудия Арабистонининг муҳим обьектларига баллистик ракета ва дронлар учирмоқда. Ҳусийлар коалициянинг Санога берган зарбаларига «қаттиқ ва аламли» жавоб қайтариш билан таҳдид қилганди.
Саудия кучлари эса Сано чеккасидаги ёқилғи омбори ва бошқа обьектларга “ҳусийларнинг таҳдид солиш имкониятларини зарарсизлантириш” мақсадида зарба берганини маълум қилган.
Феврал ойида Эрон Ҳўрмуз бўғозини ёпганидан кейин Боб ал-Мандаб Саудия Арабистони учун янада муҳим йўлга айланган. Ямандаги можаро 28-феврал куни АҚШ ва Исроилнинг Эронга ҳужуми билан бошланган кенгроқ урушнинг давоми сифатида қайта авж олган. Саудия Арабистони халқаро миқёсда тан олинган Яман ҳукуматини қўллаб-қувватлаб, ўтган ой ҳусийларга қарши ҳарбий кампаниясини қайта бошлаганди.
АҚШнинг Грециядаги элчиси Кимберли Гилфойл атрофидаги можаро унинг лавозимдан кетиши билан якунланмоқда. Оқ уй 13-октабр куни Гилфойлдан истеъфога чиқишни сўраганини билдирди. Бунга элчи пул, совға ва турли хизматлар эвазига Трамп маъмурияти расмийлари билан учрашиш имкониятини сотгани ҳақидаги бир қатор хабарлар сабаб бўлган.
АҚШ президенти Доналд Трамп бир кун аввал Гилфойлни ишдан бўшатишни кўриб чиқаётганини айтган эди. “У яхши ишлаётган эди, лекин биз ўқиган нарсалар бизга ёқмади”, деди Трамп журналистларга. Оқ уйнинг янги матбуот котиби Кейти Закария ҳам Гилфойлдан истеъфо сўралганини тасдиқлади.
Гилфойлнинг ўзи эса айбловларни яна рад этди: “Бу айбловлар ёлғон, мен номим, обрўйим ва ҳалоллигимни қатъий ҳимоя қилмоқчиман”, деб ёзди у.