Самарқанддан Тошкентгача 500 кВ кучланишли электр узатиш тармоғи қурилмоқда

Самарқанддан Тошкентга 500 кВ кучланишли электр узатиш тармоғи қурилмоқда

Самарқанддан Тошкентга янги икки занжирли 500 киловольтли (кВ) электр узатиш тармоғи қурилмоқда, деб хабар берди Энергетика вазирлиги.

Вазирлик маълумотларига кўра, ушбу йирик лойиҳа Саудия Арабистонининг ACWA компанияси билан ҳамкорликда Самарқанд вилоятининг Нуробод туманида амалга оширилмоқда. Лойиҳа 1000 мегаваттли (МВт) қуёш фотоэлектр станцияси, 1336 мегаватт-соат (МВт-с) қувватга эга электр энергиясини сақлаш тизими ҳамда янги 500 кВ ва 220 кВ кучланишли узатиш тармоқларини ўз ичига олади.

Асосий таркибий қисмлардан бири Нуробод туманидан Тошкент вилоятидаги «Ҳалқа» подстанциясигача бўлган 350 километрлик тармоқдир. У Самарқанд, Жиззах, Сирдарё ва Тошкент вилоятлари ҳудудидан ўтади. Таянч устунларнинг пойдевор ишлари якунланиб, уларни ўрнатиш бошланди.

Тармоқ Марказий Осиёда илк бор қўлланилаётган янги лойиҳадаги 500 кВ кучланишли икки занжирли таянч устунлари ёрдамида қурилади. Таянч устунлари махсус янги дизайн асосида яратилган бўлиб, уларнинг техник ечимлари Ҳиндистоннинг Larsen & Toubro компанияси томонидан синовдан ўтказилган. Натижада, ушбу конструкциялар Марказий Осиё энергетика инфратузилмаси учун янги ечим ҳисобланади.

Лойиҳа, шунингдек, қўшимча 150 километрлик 220 кВ кучланишли тармоқни ҳам ўз ичига олади ва унинг ишлари тахминан 50 фоизга бажарилган. Уни 2027 йилнинг май ойида якунлаш режалаштирилган бўлиб, бу лойиҳа доирасидаги узатиш тармоқларининг умумий узунлигини 500 километрга етказади.

500 кВ кучланишли «Нуробод — Тошкент Ҳалқа» тармоғи қурилишини 2028 йилнинг биринчи чорагида якунлаш кўзда тутилган.

«Янги узатиш тармоқлари Нурободда қурилаётган қуёш станцияси ва энергияни сақлаш тизимини ягона электр тармоғига интеграция қилишга, марказий ҳудуддаги янги генерация манбаларидан Тошкент шаҳри, Тошкент вилояти ва водий вилоятларига электр энергиясини етказиб бериш қувватини кенгайтиришга ҳамда ушбу ҳудудларда электр таъминотининг барқарорлиги ва ишончлилигини оширишга хизмат қилади», дейилади вазирлик баёнотида.

Бундан аввалроқ Ўзбекистонда Марказий Осиёда энг йирик деб таърифланган энергетика объектлари ишга туширилгани, қарздорлик туфайли электр ёки табиий газдан узилган истеъмолчиларни қайта улаш учун қўшимча тўлов бекор қилингани ҳамда электр энергиясидан масъулият билан фойдаланувчи тадбиркорлик субъектлари учун 100 фоизлик олдиндан тўлов талаби бекор қилиниши ҳақида хабар берилган эди.