Самарқандда Болалар фаровонлиги масалалари бўйича Бутунжаҳон саммити старт олмоқда

Самарқандда Болалар фаровонлиги масалалари бўйича Бутунжаҳон саммити бошланмоқда

21—22 октябрь кунлари Самарқандда Болалар фаровонлигига инвестиция киритиш бўйича Бутунжаҳон саммити (World Summit on Investing in Children’s Well-being) бўлиб ўтади. Унда 100 дан ортиқ мамлакат вакиллари иштирок этиши кутилмоқда. Форумнинг асосий вазифаси — болаликни ҳимоя қилиш, саломатлик, таълим ва оилаларни ижтимоий қўллаб-қувватлаш мавзуларини халқаро даражага олиб чиқишдан иборат.

Саммит Ўзбекистон ташаббуси билан ЮНИСЕФ, Жаҳон соғлиқни сақлаш ташкилоти, Жаҳон банки ҳамда БМТ Бош котибининг Болаларга нисбатан зўравонлик масалалари бўйича Махсус вакили билан ҳамкорликда ўтказилмоқда.

Дастурда ялпи мажлис, учта мавзули панель сессияси, Болалар онкологияси бўйича иккинчи халқаро конгресс ва бир қатор турдош тадбирлар режалаштирилган. Саммит якунлари бўйича Самарқанд декларацияси қабул қилиниши кутилмоқда.

Алоҳида урғу Ўзбекистондаги ислоҳотларга берилади. Тақдим этилган материалларга кўра, мамлакатда ижтимоий хизмат турлари сони 26 тадан 140 тагача ошди, болалар камбағаллиги даражаси 21,5% дан 5,4% гача камайди, мактабгача таълим қамрови эса 27,7% дан 78% гача ортди.

Бугунги кунда мамлакатда 208 та «Инсон» ижтимоий хизматлар маркази фаолият юритмоқда, оилалар эҳтиёжларини эса деярли 9 минг нафар ижтимоий ходим баҳолайди ва ҳамроҳлик қилади. Бундай механизм муаммоларни эрта аниқлаш ҳамда болалар ва оилаларга манзилли ёрдам кўрсатишга қаратилган.

Саммит доирасида оналик ва болаликни муҳофаза қилиш, таълим, реабилитация, инклюзия ва болалар ҳуқуқларини ҳимоя қилиш соҳасидаги ислоҳотларга бағишланган «Дунё болалар нигоҳида» кўргазмаси ҳам бўлиб ўтмоқда. Алоҳида экспозициялар онкологик касалликларга чалинган болаларни қўллаб-қувватлаш ва паллиатив ёрдам тизимини ривожлантиришга бағишланган.

Тақдим этилган маълумотларга кўра, Ўзбекистонда болада онкологик касаллик гумон қилинган пайтдан бошлаб даволаниш бошлангунига қадар бўлган муддат 130–160 кундан 10–18 кунгача қисқарди. Онкологик касалликларга чалинган болаларнинг бир йиллик яшовчанлиги 37% дан 44,5% гача ошди.

Ташкилотчиларнинг таъкидлашича, ислоҳотлар натижадорлигининг асосий кўрсаткичи ҳар бир боланинг ҳаёт сифати реал даражада яхшиланиши бўлиши керак. Саммит эрта ривожланиш, зўравонликдан ҳимоя қилиш, инклюзив таълим, болалар онкологик касалликларини даволаш ва оилаларни қўллаб-қувватлаш масалаларида халқаро тажриба алмашиш ва ҳамкорликни ривожлантиришга хизмат қилиши кўзда тутилган.