Самарқанд ШҲТнинг хавфсизлик бўйича биринчи экспертлар мулоқотига мезбонлик қилади
5–6 ноябрь кунлари Самарқандда рақамли технологиялар асрида хавфсизликка таҳдидларни муҳокама қилиш учун 24 та давлат ва бешта халқаро тузилма вакиллари йиғилади.
Самарқанд ШҲТнинг хавфсизлик бўйича биринчи экспертлар мулоқоти майдонига айланади
2026 йил 5–6 ноябрь кунлари Самарқандда хавфсизлик масалалари бўйича биринчи экспертлар «ШҲТ плюс мулоқоти» бўлиб ўтади. Учрашувда иштирокчилар рақамли технологиялар ва сунъий интеллект ривожланишини ҳисобга олган ҳолда терроризм ва экстремизмга қарши курашишни муҳокама қиладилар.
Тадбир Ўзбекистон Давлат хавфсизлик хизмати раҳбари, генерал-полковник Бахтиёр Қурбонов раислигида ўтказилади.
Учрашувда ШҲТга аъзо давлатлар, кузатувчи мамлакатлар ва мулоқот бўйича ҳамкорларнинг махсус хизматлари, халқаро ташкилотлар раҳбарлари ва вакиллари, шунингдек, таклиф этилган меҳмонлар иштирок этади. Жами 24 та давлат ва бешта халқаро тузилмадан 33 та делегация келиши кутилмоқда.
Муҳокаманинг бош мавзуси «Рақамли трансформация даврида хавфсизлик: янги технологиялар ривожланишини ҳисобга олган ҳолда терроризм ва экстремизмга қарши курашиш» бўлади. Иштирокчилар илғор технологиялар ва сунъий интеллект замонавий хавф-хатарлар ҳамда хавфсизликка таҳдидлар хусусиятига қандай таъсир кўрсатаётгани ҳақида фикр алмашадилар.
Экспертлик форматини ташкил этиш ташаббуси Ўзбекистон Президенти Шавкат Мирзиёевга тегишли. У ушбу таклифни илк бор 2024 йилда Астанада бўлиб ўтган ШҲТ саммитида илгари сурган эди.
2025 йилда Хитойнинг Тяньцзинь шаҳрида бўлиб ўтган ШҲТга аъзо давлатлар раҳбарлари кенгаши мажлисида биринчи учрашувни Самарқандда ўтказиш таклиф қилинган эди.
Мулоқот якунлари бўйича делегациялар раҳбарлари рақамли трансформация шароитида халқаро терроризм ва экстремизмга қарши курашишда ҳамкорликнинг аниқ вазифалари ва устувор йўналишларини белгилаб олишни режалаштирмоқдалар.