Салвадор президенти Гаитида топширилган жасадлар гаровга олинганларники эмаслигини айтди

Сальвадор президенти Гаитида топилган жасадлар гаровга олинганларга тегишли эмаслигини айтди

Найиб Букеле Гаитидаги Сальвадор кучларига топширилган жасадлар "бизнинг одамлар эмас"лигини билдирди.

Сальвадорлик гаровдагиларни қайтариб олиш учун Гаитига юборилган махсус кучларга топширилган тўртта жасад "бизнинг одамлар эмас", деди Сальвадор президенти.

Найиб Букеленинг айтишича, ноҳукумат ташкилотларидан бири Гаити аэропортларидан бирига одам қолдиқларини олиб келиб, улар тўрт нафар сальвадорлик авиация техники эканини даъво қилган, бироқ жасадлардан бири боланики бўлган, бошқаси эса ўзга мамлакат ҳарбий формасини кийиб олган эди.

Пайшанба куни тўрт нафар эркак "тиш-тишигача қуролланган жиноий гуруҳлар"нинг пистирмасига дуч келиб йўқолганидан кейин, у юзлаб ҳарбийлардан иборат экани айтилган ҳарбий контингентни юборган эди.

Гаровга олинганлар БМТ томонидан қўллаб-қувватланадиган, Гаитида тобора кучайиб бораётган тўдалар зўравонлигига қарши курашиш учун мўлжалланган Тўдаларни бостириш кучлари (GSF) таркибида бўлган.

Эркаклар зирҳли машинада ўз лагерларига қайтаётганда, Кариб денгизидаги орол-давлатнинг Круа-де-Буке номи билан танилган ва қуролли гуруҳлар назоратида бўлган ҳудудида ҳужумга учраган. Ҳозирча ҳеч бир тўда масъулиятни ўз зиммасига олгани йўқ.

Букеле аввалроқ Сальвадорнинг Гаитидаги ҳарбий операциясидан ягона мақсад — тўрт кишини соғ-омон қайтариш эканини айтган эди. Гаитининг Le Nouvelliste газетасига кўра, ҳозиргача 450 га яқин аскар жойлаштирилган.

Букеле миссия томонидан қабул қилинган жасадлар орасида "бизнинг авиация техникларимизга қараганда анча баланд бўйли" эркакнинг жасади, "бизники бўлмаган армия формасининг бир қисмини кийиб олган" шахс борлигини, шунингдек, қолдиқлар орасида бошқа мамлакатларнинг шахсни тасдиқловчи гувоҳномалари ва формалари ҳам бўлганини айтди.

У GSF аъзосининг гувоҳномаси ва Африкадаги Чад давлатининг унга мос келувчи миллий ID-картаси тасвирланган фотосуратларни жойлаштирди.

Букеленинг баёнотлари New York Times газетасининг аввалги хабарига шубҳа уйғотди. Унда Сальвадор миссиясига яқин манбаларга таяниб, шанба куни Гаити пойтахти Порт-о-Пренс чеккасида топилган жасадлар бедарак йўқолганларники экани тахмин қилинаётгани айтилган эди.

Газетанинг ёзишича, ҳарбий контингентга топширилган жасадлар қаттиқ куйган, шунинг учун уларнинг шахсини аниқлаш учун тиббий экспертиза талаб қилинади.

Манбалардан бирининг сўзларига таяниб хабар берилишича, Букеле жойлаштирган ID-карта аслида яраланганда уни йўқотиб қўйган аскарга тегишли бўлган.

Гаити йиллар давомида тўдалар зўравонлигидан азият чекиб келмоқда, аммо 2021 йилда президент ўлдирилганидан кейин юзага келган сиёсий бўшлиқда инқироз янада чуқурлашди.

Зўравонликни жиловлаш ва қуролли тўдаларни чекинтириш учун юборилган кўпмиллатли кучлар уларнинг назоратидаги ҳудудларга киришга қийналмоқда.

БМТ октябрь бошида жорий йилнинг 1 январидан 11 сентябригача бўлган даврда 5 700 дан ортиқ киши тўдалар томонидан ёки уларга қарши операцияларда ўлдирилгани ёки яраланганини маълум қилди.

Букеленинг айтишича, GSFнинг тўрт нафар аъзоси у ерда асосан "уруш олиб бориш учун эмас, балки тиббий эвакуацияларни амалга ошириш ва одамлар ҳаётини сақлаб қалиш" учун бўлган.

Улар асирга олинганда, вертолётлар сафарбар этилган ва воқеа жойига етиб бориш учун бир неча бор уринишлар қилинган, аммо бу ҳаракатларга ҳудуддаги отишмалар халақит берган, хабар қилди Сальвадор қуролли кучлари.