Салқинлик яна жазирама билан алмашади
24–30-август кунлари Ўзбекистонда иссиқлик бироз чекинади. Бироқ ҳафта охирига бориб ҳарорат яна кўтарилиши кутилмоқда. Бу шароит қишлоқ хўжалиги учун нисбатан енгиллик берса-да, жануб ва чўл ҳудудларида жазирама ҳамда қуруқ ҳаво таъсири сақланиб қолади.
Салқинлик яна жазирама билан алмашади
24-30-август кунлари Ўзбекистонда ҳаво ҳарорати бироз пасаяди, бироқ ҳафта охирига бориб яна кўтарилиши кутилмоқда. Бу ҳолат қишлоқ хўжалиги учун енгиллик келтирса-да, жанубий ва чўл ҳудудларида жазирама ва қуруқ ҳаво таъсири давом этади.
Ҳафта давомида кутилаётган об-ҳаво ҳақида иқлимшунос Эркин Абдулаҳатов маълумот берди.
**Қишлоқ хўжалигига таъсири**
Ҳафтанинг биринчи ярмида кундузи +35…+38 даража, тунлари эса +17…+22 даража ҳарорат ўсимликлар учун ўтган ҳафтага нисбатан қулайроқ шароит яратади. Аммо Сурхондарё, Қашқадарё, Бухоро-Навоий чўллари ва Қизилқумда +40 даражагача иссиқлик намлик танқислигини кучайтириши мумкин. Шу сабабли экинларни суғориш ва тупроқ намлигини сақлашга алоҳида эътибор қаратиш лозим.
Кучли шамол ва чанг-тўзонлар тупроқ намлигининг буғланишини тезлаштириб, экинларга қўшимча стресс юклаши мумкин. Ҳафта охирида иссиқликнинг қайта кучайиши сабабли август охирида экинларнинг сувга бўлган эҳтиёжи юқори бўлиб қолади.
**Аҳоли саломатлигига таъсири**
Ҳафта боши ва ўртасида ҳароратнинг пасайиши инсонлар учун ўтган ҳафтадаги кучли иссиқликка нисбатан сезиларли енгиллик беради. Тунги +17…+22 даража ҳарорат организмнинг ортиқча иссиқлик юкидан халос бўлиши учун қулайроқ шароит яратади.
Бироқ жанубий ва чўл ҳудудларида +40 даражагача иссиқлик сақланиб қолиши сабабли куннинг энг иссиқ пайтларида очиқ ҳавода узоқ қолиш ва оғир меҳнат қилишдан сақланиш тавсия этилади. Ҳафта охирида иссиқликнинг қайта кучайиши билан термик юк ҳам ортади.
Умуман олганда, ҳафта қишлоқ хўжалиги ва аҳоли учун нисбатан енгилроқ бошланади, аммо август охирида иссиқлик ҳали чекинмайди.