Руминия қирғоқлари яқинида танкердаги ёнғин сабабли экипажнинг саккиз аъзоси бедарак йўқолди
Қора денгизда Руминия қирғоқлари яқинида кемада ёнғин ва портлаш юз бергани ҳақида хабар берилганидан кейин 12 нафар экипаж аъзосидан 8 нафари бедарак йўқолди.
Руминия қирғоқлари яқинида танкердаги ёнғиндан сўнг экипажнинг саккиз аъзоси бедарак йўқолди
Руминия қирғоқлари яқинида танкерда ёнғин чиққанидан сўнг экипажнинг 12 аъзосидан саккиз нафари бедарак йўқолди, деб хабар берди ҳарбий-денгиз расмийлари. Хабарларда бортда портлашлар содир бўлгани ҳам айтилмоқда.
Сан-Марино байроғи остида сузаётган Wine Trader кемаси пайшанба куни эрталаб Сулина яқинидаги Дунай дарёси қуйилиш жойидан тахминан 13 денгиз мили (24 км) шарқда портлашлар ва ёнғин ҳақида хабар берган.
Қора денгизнинг ғарбий қирғоқларида сўнгги икки ҳафта ичида бир қатор дрон ҳужумлари юз берди ва яқин атрофдаги кемалардан олинган тасдиқланмаган хабарларга кўра, танкерга иккита дрон урилган.
Пайшанба кунги ёнғин содир бўлган жойдан унча узоқ бўлмаган ҳудудда, Украинанинг Змейний ороли яқинида тунда Россия дронлари тўдаси аниқланган.
Сешанба куни Руминиянинг қўшниси бўлган Болгария қирғоқлари бўйлаб жануброқда иккита савдо кемасига дронлар урилган ва кемалардан бири чўкиб кетган. Болгария ушбу ҳужум ортида Россия турганидан гумон қилаётганини билдирди ва ушбу мамлакат элчисини чақиртирди.