Руминия президентлигига собиқ номзод қўлга олинди
Руминия президентлигига собиқ номзод қўлга олинди
Руминияда 2024-йилги президентлик сайловида иштирок этиб, биринчи босқичда ғалаба қозонган собиқ номзод Келин Жоржеску қўлга олинди.
Маълумотларга кўра, Жоржеску 1,1 миллион евролик фирибгарлик иши бўйича гумон қилиниб ушланган. 2024-йилда Руминия Конституциявий суди Россия аралашуви гумони сабаб у қатнашган сайлов натижаларини бекор қилганди. Руминия матбуоти фирибгарлик ишида Россиянинг ҳам қўли борлигини ёзмоқда.
Антена3 СНН хабарига кўра, Жоржеску 21-сентябр куни эрталаб ўз машинасида бассейнга кетаётган пайтда қўлга олинган.
Полициячилар уни тинтув ўтказиш учун уйига олиб борган. Жоржеску иши билан боғлиқ тинтувлар унга тегишли бешта уйда ўтказилмоқда. Уюшган жиноятчилик ва терроризмга қарши кураш бошқармаси (ДИИСОТ) баёнотига кўра, 2021-йилда Руминиянинг икки фуқароси ва италиялик шахс жиноий гуруҳ тузган. Улар руминиялик ишбилармонларга миллионлаб евро миқдорида кредит олишни таклиф қилган, бироқ бунинг эвазига гаров пули сўраган.
Жабрланувчи фирибгарларга аввал 6 миллион евро кредит олиш умидида 1 миллион евро, кейинроқ кредит миқдорини 15 миллион еврогача ошириш таклифидан сўнг яна 100 минг евро ўтказган. ДИИСОТ гумонланувчилар ва жабрланувчининг исмини ошкор қилмаган. Гуруҳ раҳбари 64 ёшли руминиялик экани таъкидланган.
Маҳаллий ОАВ маълумотларига кўра, ишда Жоржескудан ташқари 47 ёшли руминиялик тадбиркор Ионел Русен ва 56 ёшли италиялик Массимилиано Арена ҳам иштирок этган. Жабрланувчи эса руминиялик тадбиркор Разван Леу ҳисобланади.
Г4Медиа ва Эуроневс Романиа хабарига кўра, тинтув вақтида полиция сигнални блокловчи қурилма ҳамда Келин Жоржеску номига берилган Малта орденининг қалбаки гувоҳномасини топган. Ҳужжатда Жоржеску сенатор сифатида кўрсатилган. Малта орденининг Руминиядаги элчиси Роберто Муснечи эса Жоржеску ушбу орден аъзоси эмаслигини маълум қилган.
Г4Медиа ва Диги24 манбаларига кўра, терговда Доминикада рўйхатдан ўтган Мигом Банк номи ҳам тилга олинмоқда. Банк ҳужжатларда Швейсария фуқароси Томас Скеттига тегишли бўлган, аммо амалда уни Россия фуқаролари назорат қилган. Леу баёнот бериб, 2024-йил январ ойида ДИИСОТ текширувига асос бўлган ариза билан мурожаат қилганини тасдиқлади.
“Мен буни бир сабабга кўра қилдим: машаққатли меҳнат билан топилган миллиондан ортиқ еврони ҳеч қачон амалга ошмаган молиялаштириш ваъдалари туфайли йўқотдим. Бир неча йил давомида мен пулни тинч йўл билан қайтаришга ҳаракат қилдим, лекин бунга эришмадим”, деди у.
Тадбиркор унинг ҳаракатларида сиёсий сабаблар бўлмаганини таъкидлади.
“Мен каби миллионлаб руминлар, ўзингиз кўрганингиздек, Келин Жоржескуга ишонган. Мен Келин Жоржеску ва унинг сўзларига тўла ишонардим. Афсуски, буларнинг барчаси фирибгарлик схемаси, алдов бўлиб чиқди”, дея қўшимча қилди Леу.
Бухарестдаги ДИИСОТ биноси олдида собиқ президентликка номзоднинг бир неча юз нафар тарафдори тўпланган. Фирибгарлик иши Жоржескуга қарши биринчи жиноий иш эмас. У аввал ҳам давлат тўнтаришини уюштиришга уринишда айбланган. Келин Жоржеску 2024-йил ноябр ойида бўлиб ўтган президентлик сайловининг биринчи турида кутилмаганда ғалаба қозонган. Бироқ Руминия Конституциявий суди “Россия аралашуви” туфайли овоз бериш натижаларини бекор қилди ва Жоржескуга сайловда қайта қатнашишига рухсат бермади.