Россиянинг Киевга ҳужумида беш киши ҳалок бўлди (видео)

Россиянинг Киевга уюштирган ҳужумида беш киши ҳалок бўлди (видео)

Россия Киевнинг Соломянский туманидаги офис биносига дрон билан зарба берди. Украина пойтахти мери Виталий Кличкога кўра, ҳужум оқибатида камида тўрт киши ҳалок бўлган.

Дрон келиб тушган офис биноси ёнидаги автотураргоҳдан камида уч кишининг жасади топилган. Кличконинг айтишича, яна етти киши, жумладан бир бола жароҳат олган. Бинонинг фасади зарар кўрган, деразалари синган.

Бундан ташқари, Соломянский туманидаги тиббиёт муассасаларидан бири ҳам шикастланган. Унинг яқинида бўлган уч киши шифохонага ётқизилган.

Шунингдек, ҳужум оқибатида ДатаГроуп провайдерининг маълумотларни қайта ишлаш маркази ҳам зарар кўрган. Компания ходимлар орасида жабрланганлар йўқлигини маълум қилди. Мижозлар маълумотлари сақланиб қолгани, барча хизматлар эса захира марказлари орқали ишлашда давом этаётгани айтилди.

Украина президенти Владимир Зеленский Россия қўшинлари кун давомида МсДоналдъс фойдаланадиган омборга ҳам дрон билан зарба берганини айтди.

“Жанговар дрон — оддий озиқ-овқат маҳсулотларига қарши. Россия эскалацияни мунтазам кенгайтирмоқда: Америка ва бошқа мамлакатларнинг бизнеслари, маълумотлар маркази, интернет провайдерлари — кундалик ҳаётнинг ўзи Россия учун нишонга айланди”, деб ёзди Зеленский.

Кличконинг аниқлик киритишича, 25-сентябр куни Киев бўйлаб уюштирилган Россия ҳужумлари оқибатида жами беш киши ҳалок бўлган, яна 31 киши жароҳатланган. Улардан 15 нафари шифохонада. Жабрланганлар орасида икки бола бор.