“Россиялик хонандалар учун Ҳамдам Собиров — даҳо”. Қўшиқчи Гафур “Кўк жигули”нинг машҳурлиги ва Москвада лапша еб кун кўргани ҳақида

“Россиялик хонандалар учун Ҳамдам Собиров — даҳо”. Хонанда Гафур “Кўк жигули” қўшиғининг машҳурлиги ва Москвада лапша еб кун кечиргани ҳақида сўзлаб берди.

“Новда”, “Сой қўшиғи” ва “Элпарвар” филмларидаги турли роллари билан танилган Гафур (Абдулғофур Исахонов) ҳозирда рус тилида ижод қилувчи мусиқа ихлосмандларининг севимли хонандасига айланган. У Тошкентга келиб, болалиги, тиш шифокори бўлиш учун ўқигани, рус тилини билмай Россияга кетгани ва қандай қилиб машҳурликка эришгани ҳақида ҳикоя қилди.

**“Майкл Жексоннинг мухлиси бўлганман”**

“Мусиқа доим юрагимда бўлган, аммо қўшиқ айтишни билмасдим. Уч ёшимда амаким Америкадан Майкл Жексоннинг кассетасини олиб келиб берган. Ўзимнинг кимлигимни, исмимни билмасам ҳам, унинг қўшиқларини, ҳаракатларини билардим.

Ёшлигимда дўстларим билан кўчага чиқиб, ўтиришларга бормаганман. Мусиқа мактабида, тўгаракларда ҳам ўқимаганман. Шу пайтгача мусиқа ҳақида нима билсам — ҳаммаси ўзим мустақил уйда ўрганган билимларим. Маҳаллада бир акамнинг Пайнет шохобчасига бориб, озгина ишлаб бериб, эвазига ЁуТубеъдан хонандаларнинг қўшиғи, қандай нола қилиши, клипларини кўриб, қайтаришга ҳаракат қилиб ўтирардим”, — дейди Гафур болалиги ҳақида гапириб.

**Тиш шифокори бўлишни хоҳламаган**

Гафур ота-онасининг хоҳиши билан уч йил тиббиёт коллежида тиш шифокори йўналишида ўқиган. У ерни тамомлаб, Ўзбекистон санъат ва маданият институтига ўқишга кирган. Биринчи курсда ўқиётганида курсдошларидан Россияда “Песни” шоусининг иккинчи мавсуми ўтказилиши ҳақида эшитиб, унда қатнашиш истаги пайдо бўлган.

“Йўқ, мен ҳам бораман, самолётдалигимда жавоб келади, деганман. Ўша вақтлар университетда ўқиётган бўлсангиз, чет элга чиқиш мумкин эмасди. Деканимиз ҳам бу ҳақида қаттиқ огоҳлантирган. Дадам эса “Ҳеч нимани ўйлама, бориб қатнашиб келавер” деб мени қўллаб-қувватлаган”, — дейди Гафур.

**“Москвада ўтказилган танловдан ўта олмаганман”**

“Рус тилини 20 фоиз билардим. “Менинг исмим Абдулғофур, салом, хайр, мен Ўзбекистонликман” деган жумлалардан нарига ўта олмасдим. Хуллас, кастингга бордик, билмадим қандай қилиб, биринчи босқичдан ўтдим. Иккинчи босқичга саҳнабоп костюмларимни кийиб, яхши тайёргарлик билан кирсам, 20 сониядан кейин ҳакамлар тўхтатиб, “Йўқ” дейишди. Ҳеч нимани тушунмай қолдим, сабаби хаёлимда аллақачон ютиб бўлган эдим. Хонанда Андро билан Инстаграм орқали танишиб, бир-биримизга мусиқаларимизнинг демо версиясини ташлаб юрардик.”

**“Элман мени ёнига чақирган”**

Гафур Тошкентга қайтганидан беш ой ўтгач, Жонй, Элман ва Андро рус эстрадасида “ёриб чиқишаётгани”ни кўриб, улар учун хурсандлигини ёзиб юборган. Шунда лейб продюсери бўлган Элмандан “Ҳозир биз учта артистмиз. Агар яхши қўшиқ ёзиб берсанг, сени тўртинчи хонанда қилиб лейблга қўшамиз”, деган таклифни олган.

“Ёздим, йигитларга юбордим, қўшиқ уларга ёқиб, “Москвага етиб кел, бирга яшаймиз, бирга ижод қиламиз”, дейишди. Дадамга айцам, боравер ўғлим, газни бос, деган. Москвага кўчиб борганман. У ерда бир ярим йил уйдан кўчага чиқмаганман. Студия ҳам ўша уйда эди, ҳаммасини уйда қилардик. Ўзимга ўзим бирор натижага эришмагунимча ҳеч қандай кўнгилочар жойларга бориш йўқ деганман. Йигитлар колбаса ва нон олиб келиб, кетчуп, маёнез билан ерди, мен эса ноннинг ўзига кетчуп суртиб ердим. Яна тезпишар лапшалар ердик.

Шундай қилиб бир йил ўтди. Келишувга кўра, улар мени тўртинчи хонанда қилиб расман эълон қилиши керак эди, лекин жим-жит. Йигитлар консертлар беришяптию, мен уларга ёзиб берган ўша қўшиғимни ҳали ҳам чиқаришмаганди. Сабаби битта қўшиқ чиққач, икки ҳафтадан кейин яна янгиси чиқиш керак эди. Мен ёзаётган қўшиқларим Жонй билан Андрога ёқса, Элманга ёқмасди. Шу билан миямда “Менимча бундан бирор нарса чиқмайди, фастфудъларда ишлаб бўлса ҳам, кўчада тонг оттиришга тўғри келса ҳам, кун кўраман. Уйга натижасиз қайтмайман”, деган хаёллар айланарди. Чунки кетаётганимда курсдошларим, устозларим қўлингдан келмайди деб кулишган эди”, — дея эслайди Гафур.

**“Севган қизим билан Ойга қараб, машҳур қўшиғимни яратдим”**

2019-йил декабрда хонанданинг “Луна” номли янги клипи намойиш этилган. Қисқа вақт ичида машҳурликка эришган композициянинг муваффақияти хонанданинг шахсий ҳаётини ўз ичига олганлиги билан боғлиқ. Гафур қўшиқнинг яратилиш тарихи ҳақида ҳам сўзлаб берди.

“Ўша пайтларда Тошкентда севган қизим бор эди, 4 йилдан буён гаплашардик. Мен бирдан Москвага кетиб қолганимдан сўнг, соғинч қаттиқ бўлган. Орамизда минглаб километрлар бор, телефонда гаплашиб, иккаламиз бир вақтда Ойга қарардик. Шу билан бироз бўлса-да, соғинч босилгандек бўларди. Ана шундай кунларда пианино чалиб ўтирсам, “Ой бизни ҳар куни бир-биримизга янада яқинлаштиради” деган жумла хаёлимга келган ва машҳур “Луна” қўшиғимни ёзганман. Сўзларни рус тилига таржима қилишда дўстларим ёрдам берган, чунки ўзим ҳали ҳам тилни яхши билмасдим. Йигитлар билан бир-биримизни жуда тушунмасак, қўл ҳаракатлари орқали гаплашардик. Бирор янги сўз, жумла ўргансам, ёзиб қўярдим. Шу усул орқали рус тилини яхши ўрганиб олганман”, — дейди Гафур.

**“Мени тўртинчи хонанда деб эълон қилишди, аммо…”**

“Чамаси бир йиллар ўтгач, Элман келиб, янги консертда мен тўртинчи артист сифатида эълон қилинишимни айтиб қолди. Янги қўшиқлар ёздик, имижим устида стилистлар ишлашди. Ўзимда йўқ хурсанд эдим. Саҳнага чиқиб, 4-5 минг мухлис қаршисида биринчи марта қўшиқ куйлаганман. Жамоага қабул қилинишим билан шартнома имзолаганман, аммо улар билан шунчалик ака-ука бўлиб кетганимиз туфайли шартномани ўқиб ҳам ўтирмаганман.”

**“Лоллипоп” қўшиғимни унинг рақси машҳур қилган”**

“Лоллипоп” таронасига ишланган клипдаги Гафур ва Жонйънинг рақслари ёшлар ўртасида оммалашган. Ушбу ҳаракатлар, айниқса, ТикТок ижтимоий тармоғида челленжга айланган.

“Лоллипоп” — муаллифлик қўшиқларимни энди ёзаётган пайтимдаги иккинчи треким бўлган. Жонйга қўйиб берган пайтимда унга ёқиб, кел бирга шуни куйлайлик деган. Қўшиқни басталаш жараёнида унга мос ТикТокъбоп рақс ҳам ўйлаганмиз.

Шунда Жонйга бу трек ёки хит бўлиб кетади, ёки умуман эшитишмайди, аммо ўртада қолиб кетмайди, деганман. Хуллас, қўшиқни чиқарганимиздан кейин мен кутганчалик натижа бўлмади. Топ-чартларда ҳам 70-ўринда турганди. Уйда сиқилиб ўтириб, анави рақсни бекорга ўйлаб топмагандимку деб, ТикТок учун рақсимни видеога олиб, қўйиб юборганман. Эртасига уйғонсам россиялик блогер қиз ва яна 7 мингта ТикТокер шу ҳаракатлар билан видео олган, унинг эртасига 30 мингта, эртасига 150 мингта ва шундай қилиб 700 мингта видео олинган. Қўшиғим ҳам Топ-чартларда 60, 50, 3, 2, 1-ўринга чиқиб қолди. Таксида кетаётиб, светафорда тўхтасак, ёнимиздаги машиналарда ҳам қўшиғим қўйилган бўларди. Таронам шу тариқа оммалашиб кетган”, — дейди у.

**“Рус хонандалар учун Ҳамдам Собиров — даҳо”**