Россиялик репер Жиган хизматкор ва қўриқчиларига ўқ узиб, уларни гаровда ушлаб тургани маълум бўлди (видео)
Россиялик репер Жиган хизматкор ва қўриқчиларига ўқ узиб, уларни гаровда ушлаб тургани маълум бўлди (видео)
Машҳур россиялик репер Жиган (асл исми Денис Устименко-Вайнштейн) Москва вилоятидаги уйида қўриқчилар ва хизматкорларга қарата ўқ узган. Бу ҳодиса июл ойининг бошларида юз берган бўлса-да, фақат эндигина маълум бўлди.
Маш нашри ёзишича, репер ўз ходимларини бир неча соат давомида гаровда ушлаб турган — буларнинг барчаси болалар кўз ўнгида содир бўлган. Аниқлик киритилишича, у ўзида бўлмаган ҳолатда “Сайга-9” карабини билан қуролланиб, Рембо услубида кийиниб, ходимларни меҳмонхонага чақирган ва уларни жиноятларда айблаб, жонларини сақлаб қолиш учун ҳаммасига иқрор бўлишни талаб қилган.
Устименко-Вайнштейн хуруж пайтида уларнинг барчасини душман деб билган, қўриқчилардан бирини эса ҳатто педофилликда айблаган. У эркакнинг бошига қурол тираб, буни тасдиқлашга мажбур қилган ва тасдиқ жавобини олгач, қочишга уриниб кўриши учун унга атиги беш сония берган. Белгиланган вақт тугагач, у ўқ узиб, жабрланувчининг қўли ҳамда оёғига жароҳат етказган. Қолганларни эса хоинлар деб атаган.
Болалари шкафга яшириниб олган
Қийноқ 10 соат давом этган. Шу вақт ичида репер ва блогер Оксана Самойлованинг фарзандлари шкафларга яшириниб, оналарига бўлаётган воқеани хабар қилишган. У ўша пайтда Миланда бўлган, бироқ зудлик билан Москвага учиб келган. Кейинроқ журналистлар билан суҳбатда у бу воқеани тасдиқлаган.
Шубҳали ҳолатни сезган қўшнилар Жиганни тинчлантириш учун воқеа жойига полиция, қўриқчилар ва репернинг дўстларини чақиришган. Аммо артист ўзига келишни хаёлига ҳам келтирмаган ва унга яқинлашишга уринган ҳар бир кишига ҳужум қилган.
Натижада уни ушлаб, қўлларини қайириб, Исроилнинг энг қиммат реабилитация марказларидан бирига юборишган.
Жиган қуролли можаро ортидан Исроилдаги 5 миллион рубл (60 минг доллар)лик ВИП реҳабда уч ойлик даволанишдан ўтмоқда. Унинг телефони мунтазам текшириб турилади ва ҳатто залга шуғулланиш учун ҳам уни ёлғиз юборишмайди.
Дастлабки ҳафталарда бемор ухлатувчи дорилар ва антипсихотикларни қабул қилиб, детоксдан ўтган. Кейин у кўп тармоқли терапия — психиатрлар иштирокидаги гуруҳли ва яккама-якка машғулотларга борган. Мутахассислар унинг хатти-ҳаракатлари сабабларини аниқламоқда.
Шу билан бирга, терапиядан ташқари, артист тез-тез бўлмаса ҳам, кўнгилочар тадбирларга ҳам бориб туради. Улар орасида Қуддусга саёҳат ва Ўлик денгиз бўйлаб экскурсиялар бор. Шунингдек, у спорт билан шуғулланади, унга махсус шеф-повар овқат тайёрлайди. Хоҳишига кўра, унинг ихтиёрида озиқ-овқатга тўла учта музлаткич ҳам мавжуд.
Жиганнинг телефони мунтазам равишда текшириб турилади, реперга доим кимдир ҳамроҳлик қилади. Унга ҳар ҳафта оиласи билан кўришишга рухсат берилган, аммо улар реабилитация марказига ҳозирча боришмаган. Аниқлик киритилишича, репернинг қариндошлари ҳам психологлар билан ишлашмоқда.
Маълум бўлишича, Жиган ўз ходимини сабабини тушунтирмасдан СМС орқали бир куннинг ўзидаёқ ишдан бўшатиб юбориши мумкин эди. У кўпинча ходимларни камситар, уларни сўкиб, жазолаш билан таҳдид қиларди.
Тажовузкорлик хуружларидан бирида у болаларининг севимли энагасини ишдан бўшатиб, унга бошқа келмаслиги ҳақида хабар ёзган. Одатда бундай ҳолат унинг собиқ рафиқаси — Оксана Самойлова уйдан кетганида содир бўлган. Уйга қайтганида эса аёл вазиятга ҳеч қандай таъсир ўтказа олмасди.
Жиган ва Оксана Самойлова 2012-йил декабрида турмуш қурган. Никоҳ давомида тўрт фарзанд — Ариела, Леия, Мая ва Давид дунёга келган. Уларнинг турмуши давомида бир неча бор жиддий инқирозларни бошдан кечирган. Хусусан, 2020-йилда Жиган реабилитация марказида даволанган, шундан кейин эр-хотин муносабатларини тиклашга уринган.
2025-йилда Самойлова ажрашиш учун ариза берган. 2026-йил 1-апрелда никоҳ расман бекор қилинган. Фарзандлар Самойлова билан қолган. Бироқ ажрашгандан кейин ҳам Жиган болалари билан алоқани давом эттирган.
Рафиқаси билан ажрашгандан кейин Жиганнинг хулқ-атвори билан боғлиқ вазият янада ёмонлашган. Санъаткор илгари унинг хатти-ҳаракатларини қандайдир тарзда жиловлай олган рафиқасининг назоратисиз қолган.