Россиядаги сайловлар кутилмаган совғалардан холи бўлди, бироқ Кремл уларнинг натижаларидан қандай фойдаланиши ҳозирча номаълумлигича қолмоқда

Россиядаги сайловлар деярли ҳеч қандай кутилмаган янгилик келтирмади, бироқ Кремль унинг натижаларидан қандай фойдаланиши номаълумлигича қолмоқда

Россия президенти Владимир Путин яқинда Украинадаги уруш учун яна бир сафарбарлик тўлқини ўтказилиши эҳтимолини рад этди.

Россияда кўп нарсани олдиндан айтиш қийин.

Ушбу сайлов натижаси улар жумласидан эмас эди.

Кремль томонидан қатъий бошқариладиган сиёсий тизимда ҳукмрон партия — «Единая Россия» парламентдаги ўз мавқеини сақлаб қолиши кенг кутилган эди.

Ҳеч қандай кутилмаган ҳолат юз бермади. Ҳеч қандай сюрпризлар бўлмади. Ҳеч бир рақиб партия унга яқинлаша олмади.

Дастлабки натижалар шуни кўрсатмоқдаки, «Единая Россия» Давлат Думасидаги конституциявий кўпчилик овозини сақлаб қолиш арафасида.

Бу Украинадаги тўрт ярим йилдан ортиқ давом этган урушдан кейин юз бермоқда, ушбу уруш Россия армияси учун жанг майдонида катта йўқотишлар олиб келди, иқтисодий қийинчиликларни келтириб чиқарди ва Украина дронларининг Россия нефть объектларига уюштирган ҳужумларидан кейин бензин тақчиллигига сабаб бўлди.

Афтидан, 5 фоизлик тўсиқдан ўтиб, янги Думага кирган партиялар аввалги парламентда ўтирган партияларнинг ўзгинасидир.

Ва ўша Дума Кремлни ва «махсус ҳарбий операция» деб аталувчи ҳаракатни тўлиқ қўллаб-қувватлаган эди.

Парламентга кира олмаган партиялардан бири «Яблоко» бўлди.

«Яблоко» ушбу сайловда қатнашишига рухсат берилган ягона урушга қарши партия эди. Аммо рўйхатдан ўтганидан атиги 12 кун ўтгач, Олий суд уни сайлов бюллетенидан чиқариб ташлади. Бу Кремлнинг «Яблоко» партиясининг тинчликпарварлик ғоялари жамоатчилик орасида жуда кучли акс-садо бераётганидан хавотирда эканидан далолат берарди.

Парламент янги таркибининг ҳам худди аввалгисидек итоаткор бўлиши кутилаётганидан партия ҳайратда эмаслигини айтмоқда.

«Агар бюллетенда 10 та партия бўлган бўлса ва уларнинг барчаси [Россия президенти Владимир] Путин сиёсатини қўллаб-қувватласа, яна қандай натижа бўлиши мумкин?» — дейди менга «Яблоко» партияси раиси Николай Рыбаков.

«Дума ўзгаради деб ўйламайман. Улар худди аввалгидек Путин сиёсати учун 100 фоиз овоз беришади».

Гарчи «Яблоко» партиявий рўйхатдан чиқариб ташланган бўлса-да, унинг 100 га яқин номзоди, ҳатто партия кучли босимга дуч келишда давом этган бўлса ҳам, индивидуал сайлов округларидаги пойгада қолди.

«Номзод бўлиши керак бўлган баъзи вакилларимиз қамоқда, кўпчилигига номзодини қўйиш тақиқланди, сайлов кузатувчиларимизнинг баъзилари эса рўйхатга олинмади ва овоз бериш жараёнини кузата олмади», — дейди Николай.

Уч кунлик сайловнинг сўнгги куни олдидан Украина Москва вилоятига йирик дрон ҳужумини уюштирди.

Шаҳардаги нефтни қайта ишлаш заводи зарбага учради.

Нефтни қайта ишлаш заводи яқинидаги сайлов участкасида мен сайловчилар билан ҳужум ҳақида гаплашдим.

Бу ерда ҳам деярли ҳеч ким ҳайратланмади.

Россиянинг Украинага қарши уруши бошланганига тўрт ярим йилдан ошган бир пайтда, москваликлар ўз шаҳарларининг вақти-вақти билан фронт чизиғига айланишига ўрганиб қолишган. Ҳайратланиш ўрнига, сукут ичида тақдирга тан бериш ҳукмрон эди.

«Донбассдаги, шунингдек, Украина билан чегарадош Брянск ва Белгороддаги одамлар ҳар куни шундай нарсаларни эшитишади», — дейди сайлов участкасини тарк этган Виктор исмли сайловчи.

«Улар шунчаки ўз ҳаётларини давом эттиришмоқда».

Агар сайлов натижасини олдиндан айтиш мумкин бўлган бўлса, ундан кейин нима бўлишини тахмин қилиш анча қийин.

Кремль, эҳтимол, ушбу натижадан аксарият россияликлар президент атрофида бирлашганини даъво қилиш ҳамда келажакдаги сиёсатни ва уруш бўйича кейинги қарорларни ҳимоя қилиш учун фойдаланади.

Президент Путин яқинда яна бир сафарбарлик тўлқинини истисно қилди.

«Бугунги кунда буни талаб қиладиган ҳеч қандай сценарий йўқ», — деди у.

Бугун эмас. Аммо эртага-чи?

Расмий рад этишларга қарамай, Россия жамиятида янги сафарбарлик эҳтимоли ҳақида ҳамон чуқур хавотир бор.

Ҳеч бўлмаганда, Кремль сайлов натижасини урушни давом эттириш учун «халқ мандати» сифатида тақдим этиши эҳтимоли юқори.

Уруш яқинлашаётган бўлиши мумкин. Биз руҳан тайёрмизми?