Россияда педофиллар реестри тузилади
Россияда вояга етмаганларга нисбатан жинсий зўравонлик қилган шахсларнинг ягона электрон реестри тузилиши режалаштирилмоқда. Бу ҳақда Медуза нашри Давлат думаси депутати Анастасия Удалсовага таяниб хабар берди.
Маълумотларга кўра, Ксения Собчакнинг “Кровавая бариня” Телеграм-канали Удалсованинг июн ойидаги сўровига берилган жавоб хатининг скриншотларини эълон қилган. Ҳужжат Россия бош вазири ўринбосари Денис Мантуров томонидан имзоланган.
Унда Ички ишлар вазирлиги бундай реестрни яратиш бўйича тажриба-конструкторлик ишларини олиб бораётгани қайд этилган. Тизимни 2027-йилда ишга тушириш кўзда тутилган. Удалсованинг ўзи бу хатни ўз каналида эълон қилмаган бўлса-да, Собчак ва яна иккита каналнинг ушбу хабарини қайта жойлаштирган.
Хусусан, хавфсизлик кучлари билан яқин алоқада бўлган “База” Телеграм канали ҳам ўз манбаларига таяниб, бундай реестр тузилаётгани ҳақида аввалроқ хабар берган эди. Удалсова билан суҳбатлашган Эхперт нашри ҳам худди шундай хабарни эълон қилди. Журналистларнинг таъкидлашича, уларнинг қўлида ҳам Собчак канали келтирган ҳужжат мавжуд.
Ҳар учала манбанинг маълумотига кўра, янги база “Зўравон педофил” деб номланади. Эхперт нашри базанинг ёпиқ бўлишини ва ундан фақат Ички ишлар вазирлиги ходимлари фойдалана олишини хабар қилмоқда. Бироқ Удалсова бу реестр очиқ бўлиши керак деб ҳисоблайди. Ушбу база қандай шакллантирилиши ҳозирча номаълум. Хусусан, унга илгари судлангани олиб ташланган шахслар киритилиши ёки киритилмаслиги ноаниқ бўлиб қолмоқда.
Россияда бундай базани яратиш ғояси сўнгги ўн йилдан бери муҳокама қилиб келинмоқда. 2015-йилда “Адолатли Россия” партияси раиси Сергей Миронов Тергов қўмитаси раҳбари Александр Бастрикинга шундай таклиф киритган эди. Депутат педофилларнинг очиқ базасини яратиш халқаро амалиётга мос келишини таъкидлаган эди.
Июл ойида Рақамли ривожланиш, алоқа ва оммавий коммуникациялар вазирлиги интернетдаги жиноятларга қарши курашиш тизимини ривожлантириш бўйича лойиҳани эълон қилди. Ҳужжатда шундай реестрни яратиш масаласини кўриб чиқиш зарурлиги айтилганди. Бироқ таклиф этилган барча механизмларни амалиётга жорий этиш 2029-йилгача режалаштирилмаган эди.