Россияда Жон Кеннедининг жиян-невараси сиртдан ҳибсга олинди
АҚШ собиқ президенти Жон Кеннедининг жиян-невараси Россияда Украина Қуролли Кучлари сафида қатнашгани учун сиртдан ҳибсга олинди.
Россияда Жон Кеннедининг жиян-невараси сиртдан ҳибсга олинди
Москванинг Басманний туман суди Америка Қўшма Штатларининг 35-президенти Жон Кеннедининг жиян-невараси, америкалик Конор Кеннедини сиртдан ҳибсга олиш ҳақида қарор чиқарди. Бу ҳақда ТАСС агентлиги маълум қилди.
Ҳозирда Кеннеди халқаро қидирувга берилган. Унинг адвокатлари ҳибсга олиш қарорини бекор қилишга уринишган, бироқ Москва шаҳар суди уларнинг шикоятини рад этиб, қуйи суд қарорини ўз кучида қолдирди. Апелляция суд мажлиси ёпиқ тарзда ўтказилди.
Конор Кеннеди ёлланма аскарликда айбланмоқда, бу жиноят учун етти йилдан ўн йилгача озодликдан маҳрум қилиш жазоси белгиланган. Аввалроқ, ушбу машҳур сиёсий сулола вакилининг ўзи 2022-йилда Харков вилоятида "Халқаро легион" таркибида Украина Қуролли Кучлари томонида яширинча жанг қилганини тан олган эди.
Жон Фицжералд Кеннеди (1917–1963) – америкалик давлат арбоби, АҚШнинг 35-президенти (1961–1963). Демократик партия аъзоси бўлган. Совуқ уруш даврининг асосий раҳбарларидан бири сифатида Кариб инқирозини бошдан кечирган. У 1963-йил 22-ноябрда Даллас шаҳрида ўлдирилган.