Россияда икки ўсмир “Калмар ўйини” таъсирида 12 ёшли мактаб ўқувчисини ўлдирди
Россияда икки ўсмир қиз "Калмар ўйини" сериалидан илҳомланиб, 12 ёшли мактаб ўқувчисини ўлдирганликда гумонланиб ҳибсга олинди. Москва вилояти полицияси Орехово-Зуево шаҳар округида содир бўлган ушбу жиноят бўйича тергов олиб бормоқда, дея хабар беради Медуза.
Воқеа 26-август куни Кабаново қишлоғида 12 ёшли боланинг ғойиб бўлиши билан бошланган. Уни қидиришга кўнгиллилар ҳам жалб қилинган. Эртаси куни боланинг жасади ташландиқ бинонинг ертўласидан кўплаб пичоқ жароҳатлари билан топилган. Бу бино илгари маҳаллий касб-ҳунар билим юртининг ётоқхонаси бўлган.
Тез орада жиноятни содир этганликда гумон қилиниб, 15 ва 16 ёшли икки нафар маҳаллий қиз қўлга олинди. Терговчилар қотиллик моддаси бўйича жиноят иши қўзғатди.
ОАВ ва Телеграм-каналлар ҳуқуқ-тартибот идораларидаги манбаларга таяниб хабар беришича, юқори синф ўқувчилари қотилликни олдиндан режалаштирган. Улар пичоқлар ва қўлқопларни тайёрлаб қўйган. Қизлар болани бир қишлоқда яшайдиган қўшниси сифатида танишган.
Бола йўқолган куни улар уни пиво ичиш баҳонаси билан сайрга таклиф қилиб, ташландиқ бинога алдаб олиб борган. Полициядаги манба "Комсомолская правда" нашрига қизлар одамларнинг қандай ўлишини кўрмоқчи бўлганини айтган. Баъзи манбаларга кўра, қизлар қотилликни телефонга тасвирга олган бўлиши мумкин, бу қандайдир видео-челленжнинг бир қисми бўлган. Бошқа манбалар эса гумонланувчилар изларни яшириш учун телефонларини атайлаб ўзлари билан олиб кетишмаганини даъво қилмоқда. Жиноятдан сўнг улар хотиржам уйга қайтган.
Ҳалок бўлган боланинг онаси Ирина "мск1" нашрига қўлга олинганларнинг бошқа қотилликларни ҳам режалаштирганини айтди. Унинг сўзларига кўра, тахминлардан бирига кўра, қизларни Жанубий Кореянинг "Калмар ўйини" сериали илҳомлантирган. Бу сериалда қаҳрамонлар омон қолиш учун шафқациз ўйинларда беллашади. "Бу якуний хулосаларми ёки терговчиларнинг фикрими, билмайман. Улар бундай хулосага келишига қизлардан бирининг хонасида ушбу сериал постерлари осиғлиқ тургани сабаб бўлган", деди у.
Шунингдек, гумонланувчининг ТикТок саҳифасидан сериалдаги қотилликлар лавҳалари йиғилган видео топилган. Кабановолик бир резидент иккала қиз ҳам босиқ ва урушқоқ бўлмаганини айтди, лекин мактабдаги тенгдошлари улар билан камдан-кам мулоқот қилган. "Улар ўзаро яхши ва иноқ муносабатда эди. Тез-тез гаплашиб, бирга сайр қилишарди. Қизлар ҳақиқатан ҳам яхши дугоналарга ўхшарди. Энди бу фожиани эшитиб, ростдан ҳам йиғлагим келяпти", деди у.
Аёлнинг таъкидлашича, қизларнинг ёнидан 50 кишилик рўйхат топилган. Ушбу рўйхатда ҳалок бўлган бола ҳам бўлган. У қизларнинг ҳеч қандай субмаданиятларга, масалан, сатанизм ёки шунга ўхшаш нарсаларга алоқаси йўқлигини, лекин "Калмар ўйини"га ҳақиқатан ҳам берилиб кетганини қўшимча қилди.
Хавфсизлик тузилмаларига яқин бўлган РЕН нашри қўлга олинганларнинг кўрсатмаларини келтирди. Гумонланувчилардан бири сўроқ пайтида узоқ вақтдан бери "қон нималигини ва одам ўлдириш қандай бўлишини" билмоқчи бўлганини тан олган.
Аввалроқ Таиланддаги мактаблардан бирида 7-август куни ўқувчи отишма уюштиргани ҳақида хабар берилганди. У ҳужумдан олдин уйида бобо-бувисини отиб ўлдиргани аниқланган. Ўсмирнинг ҳужумлари оқибатида жами 7 киши ҳалок бўлган. Уларнинг беш нафари Дебсирин Нонтҳабури мактаби қурбонлари ҳисобланади. Ўқувчи ҳужум сўнгида ўз жонига қасд қилган.