Россияда ҳарбийлар ва полициячилар жиноятлари статистикаси яширилди
Россия Олий суди ҳузуридаги Суд департаментининг 2025-йилга оид ҳисоботларида ҳарбийлар ва ҳуқуқни муҳофаза қилувчи органлар ходимлари содир этган жиноятлар ҳақидаги маълумотлар очиқланмади. Давлатга хиёнат, жосуслик ва армияни «обрўсизлантириш» каби ишлар бўйича статистика ҳам ёпилган.
Россияда ҳарбийлар ва полициячилар содир этган жиноятлар статистикаси яширилди
ДВ хабарига кўра, 2-октабр куни эълон қилинган ҳисоботлардаги ўзгаришларга «Вёрстка» нашри эътибор қаратган.
Чекловлар давлат хавфсизлигига оид ишлар, сиёсий таъқибларда қўлланадиган моддалар ҳамда ҳарбийлар ва куч тузилмалари ходимлари жиноятларига доир маълумотларни қамраб олган.
Йиғма статистикада фуқароларни вафот этган ёки бедарак йўқолган деб топиш ҳақидаги судга берилган аризалар сони яширилган.
«Вёрстка» маълумотига кўра, 2024-йилда Суд департаменти бундай аризалар сони рекорд даражага — 17,5 мингтага етганини билдирган эди.
2025-йил охирида эса Россия судлари шундай ишларни кўриб чиқишга оид маълумотларни ўз сайтларидан ўчира бошлаган.
Нашр ёзишича, Россия Жиноят кодексининг сиёсий таъқибларда қўлланадиган 28 та моддаси бўйича маълумотлар ҳам махфийлаштирилган.
Улар орасида давлатга хиёнат, хорижий давлатлар билан ҳамкорлик, жосуслик, давлат сирини ошкор қилиш, диверсия, экстремистик ҳамжамият ташкил этиш ва армияни «обрўсизлантириш»га оид ишлар бор.
Шунингдек, «чет эл агенти» мажбуриятларини бажаришдан бўйин товлаш билан боғлиқ статистика ҳам очиқланмаган.
Маъмурий ишлар орасида армияни «обрўсизлантириш», адоват қўзғатиш, сепаратизмга чақириш ва «чет эл агенти» фаолияти тартибини бузиш бўйича маълумотлар ёпилган.
Суд департаменти ҳарбий хизматчилардан ташқари судялар, прокурорлар, терговчилар, полициячилар ва Жазони ижро этиш федерал хизмати ходимлари содир этган жиноятлар бўйича статистикани ҳам очиқламаган.
Идора 2026-йил апрелида «Важнйе истории» нашрига берган изоҳида суд статистикасига кириш чекланишини «маълумотларни эълон қилиш регламенти ўзгаргани» билан тушунтирган.