Россияда банклардан рекорд миқдорда нақд пул ечиб олинди
Россияда банклардан нақд пул ечиб олиш миқдори рекорд даражага етди. Тҳе Моссов Тимес хабарига кўра, Россия банк тизимидан нақд пулнинг чиқиб кетиши тезлашган. Марказий банк маълумотларига кўра, 1-июлдан 30-июлгача бўлган даврда муомаладаги нақд пул ҳажми яна 620,9 миллиард рублга ошган. Бу июл ойида апрел ойидаги рекорд кўрсаткични (607,9 миллиард рубл) ортда қолдирган.
Сўнгги олти ой (феврал–июл) ичида банклардан жами 2543 триллион рубл нақд пул ечиб олинган. Бу маблағ Москва вилоятининг деярли икки йиллик бюджетига (1,3 триллион рубл) ва Красноярск ўлкасининг қарийб беш йиллик бюджетига (527 миллиард рубл) тенгдир. Агар бу сумма 5000 рубллик купюралар оғирлигига айлантирилса, банклар 480 тонна нақд пул ёки 48 та классик “КамАЗ” юк машинасига тенг маблағ йўқотган.
Марказий банк статистикаси шуни кўрсатадики, июл ойининг 30 кунидан 28 кунида банклардан пул чиқиб кетган. Энг катта чиқим ойнинг дастлабки икки ҳафтасида қайд этилган, бу вақтда кредит ташкилотлари деярли ҳар куни 30-60 миллиард рублдан йўқотган.
“Сбербанк” вице-президенти Тарас Скворцовнинг сўзларига кўра, бу 2026-йилдаги мутлақ ойлик рекорд ва умуман тарихда июл ойи учун энг юқори кўрсаткичдир. Унинг таъкидлашича, нақд пулнинг чиқиб кетиши банк тизими учун асосий муаммолардан бирига айланган ва бир қанча банкларда рубл ликвидлиги танқислигини келтириб чиқарган.
“Сбербанк” йил охиригача муомаладаги нақд пул ҳажми 3,8 триллион рублга кўпайишини тахмин қилмоқда. Бу Россия учун тарихий рекорд бўлади. Бу кўрсаткич 2020-йилги пандемия давридагидан (2,8 триллион рубл) ва урушнинг биринчи йилидагидан (2,2 триллион рубл) юқори ҳисобланади.
Скворцовнинг қайд этишича, солиқлар ошишидан жабр кўрган бизнес вакиллари оммавий равишда нақд пулга ва “кулранг” тўловларга ўтмоқда. Банк ходимининг тушунтиришича, “Биз, масалан, инкассация учун топшириладиган нақд пул ҳажми кескин камайганини кўрмоқдамиз. Авваллари мижозлар нақд пулда тўлов қилганда бу пул инкассация орқали банкка қайтар эди. Ҳозир эса ундай эмас. Пул мижозларнинг ўзида қолмоқда. Улар бу пулдан маош бериш ва ҳамкорлар билан ҳисоб-китоб қилишда фойдаланмоқда”.
Иқтисодчи Николай Корженевскийнинг фикрича, нақд пулнинг бундай чиқиб кетиши йирик инсайдерлар банк тизимидан пул ечиб олаётганидан далолат бериши мумкин. Улар Россияда жуда салбий ҳодиса — қандайдир кескинлашув ёки уруш содир бўлишини олдиндан биладиган одамлар бўлиши эҳтимолдан холи эмас.