Россия зарбалари Украина пўлат саноатининг 90 фоизини ишдан чиқарди
Россия зарбалари Украина пўлат саноатининг 90 фоизини ишдан чиқарди
Россиянинг ракета ҳужумлари натижасида Украинадаги учта энг йирик пўлат қуйиш заводи фаолиятини тўхтатди. Бу эса мамлакатнинг бутун пўлат саноатини хавф остига қўймоқда. Маълум қилинишича, сентябр бошида Россия Запорожье ва Днепропетровск вилоятларидаги корхоналарга баллистик ракеталар билан зарба берган. Учта заводдан иккитаси Метинвест кон-металлургия компаниясига, яна бири эса АрселорМиттал таркибига киради. Ҳужумлар оқибатида 17 нафар ищи ҳалок бўлган.
“Украинада пўлат саноат энди йўқ”, деди Метинвест бош директори офиси раҳбари Александр Водовиз.
Унинг айтишича, Россия ҳарбийлари айнан қаерга зарба беришни яхши билган. Корхоналарнинг домна печлари нишонга олинган.
Метинвест ва АрселорМиттал компанияларининг маълумотига кўра, бу заводлар биргаликда мамлакатда ишлаб чиқариладиган пўлатнинг 90 фоизини таъминлаб келган. Корхоналарда 15 мингдан ортиқ одам ишлаган. Уларнинг тўхташи иқтисодиётнинг бошқа соҳалари ва солиқ тушумларига жиддий таъсир кўрсатиши мумкин.
“Ҳозирча таъмирлаш қанча вақт олишини билмаймиз — кунлар, ҳафталар, ойлар ёки йиллар кетиши мумкин”, дея қўшимча қилди у.
Уруш бошланганидан буён Россия қуролли кучлари Украинанинг темир йўл инфратузилмаси, заводлари, омборлари ва савдо марказларига зарба бериб келмоқда. Сўнгги ойларда бундай ҳужумлар кескин кучайди.
Украина бош вазири Сергей Корецкийнинг айтишича, Россия ҳужумлари сабаб Украина тахминан 1,5 миллиард доллар солиқ даромадидан маҳрум бўлиши мумкин.
Украина президенти Владимир Зеленский мамлакат ҳарбий бюджети танқислиги 27 миллиард еврони ташкил этаётганини билдирган. У иттифоқчилардан қўшимча молиявий ёрдам сўрамоқда.