Россия ва Ўзбекистон ўртасида трансчегаравий электрон ҳужжат айланиши йўлга қўйилди
23 сентябрь куни Тошкентда РФ Рақамли ривожланиш, алоқа ва оммавий коммуникациялар вазири ўринбосари Александр Шойтов бошчилигидаги Россия рақамли сектори компанияларининг «Россия — Ўзбекистон. Технологиялар ва имкониятлар рақамли кўприги» бизнес-миссияси доирасида, Россиянинг Ўзбекистондаги Савдо ваколатхонаси кўмагида трансчегаравий электрон ҳужжат айланишини йўлга қўйишга бағишланган ялпи мажлис бўлиб ўтди.
«Трансчегаравий электрон ҳужжат айланишининг йўлга қўйилиши Россия ва Ўзбекистон ўртасидаги савдо-иқтисодий ҳамкорликни янада чуқурлаштириш йўлидаги аниқ амалий қадамлардан биридир. Бунда гап шунчаки нолдан бошланаётган лойиҳа ҳақида кетаётгани йўқ. Россиялик ва ўзбекистонлик ҳамкасблар томонидан аллақачон салмоқли тайёргарлик ишлари амалга оширилди»,
— деб таъкидлади Россиянинг Ўзбекистондаги Фавқулодда ва Мухтор Элчиси Олег Ерхов.
Дипломатнинг маълум қилишича, Россия Федерал солиқ хизмати ва Ўзбекистон Солиқ қўмитасининг пилот лойиҳаси доирасида икки мамлакат ташқи иқтисодий фаолият иштирокчилари ўртасида электрон товар-кузатув ҳужжатларини алмашиш схемаси амалий жиҳатдан синовдан ўтказилди. Шу билан бирга, ушбу лойиҳанинг аҳамияти фақатгина электрон ҳужжат айланиши доирасидан ташқарига чиқади. У Россия ва Ўзбекистоннинг миллий рақамли тизимларини амалий жиҳатдан бирлаштириш имкониятини намойиш этади ҳамда икки мамлакат ўртасидаги савдо, логистика ва ишлаб чиқариш алоқаларига ҳамроҳлик қилувчи рақамли хизматларни янада ривожлантириш учун асос яратади.
«Трансчегаравий ЭҲАнинг муваффақиятли йўлга қўйилиши Россия-Ўзбекистон ўртасидаги ҳар томонлама стратегик шериклик ва иттифоқчилик муносабатлари янги технологик мазмун билан бойитилаётганининг яна бир аниқ намунаси бўлади. Бугунги ишлар савдони, саноат кооперациясини ривожлантириш ва мамлакатларимиз бизнесининг рақобатбардошлигини оширишга қаратилган янги қўшма лойиҳалар учун ҳам асос бўлишига ишонаман», — дея ишонч билдирди Олег Ерхов.
Россия ва Ўзбекистон технологик компаниялари вакиллари икки мамлакатнинг тегишли давлат органлари ва ташкилотлари ходимлари билан биргаликда трансчегаравий электрон ҳужжат айланишини пилот ечимлардан саноат миқёсида фойдаланишга ўтказиш, ишонч инфратузилмасини ривожлантириш, электрон имзодан фойдаланиш имкониятлари ва киберхавфсизлик масалаларини муҳокама қилдилар.