Россия Украинанинг Қора денгизда ўт очишни тўхтатиш таклифини рад этди

Россия 14-август куни Украинанинг Қора денгизда ўт очишни тўхтатиш таклифини рад этди. Мамлакат бу каби "ярим чоралар"га асос кўрмаётганини, чунки улар қарши томонга танаффус беришини билдирди. Бу ҳақда Реутерс хабар берди.

Сўнгги ҳафталарда Россия ва Украина Қора денгиздаги савдо кемаларига ҳужумларни кучайтирди, бу эса жаҳон ғалла нархларининг ошишига олиб келди. Россия Ташқи ишлар вазирлиги матбуот котиби Мария Захарова ўз баёнотида Украинани кемаларга қарши "очиқчасига террорчилик ҳаракатлари"да айблади, аммо Россиянинг ўз ҳужумларига тўхталмади.

Захарова шундай деди: "Биз (Украинанинг) бу ҳужумларини минтақавий қўшниларнинг очиқдан-очиқ розилиги билан амалга оширилган сиёсат деб биламиз. Бу сиёсат вазиятни янада кескинлаштириш, низони узайтириш ва Қора денгиз минтақасида фуқаролик кемалари ҳаракатини издан чиқаришга қаратилган."

У қўшимча қилди: "Шу билан бирга, биз вазият яхшиланаётганининг ҳеч қандай белгисини кўрмаяпмиз. Бинобарин, Киев режимига вақтинчалик нафас ростлаб олиш имконини берадиган ярим чоралар учун ҳеч қандай асос йўқ."

Захарова Туркия ташқи ишлар вазири Ҳакан Фиданнинг ОАВга берган интервюсидаги баёнотига муносабат билдирди. Фидан Анқара Россия ва Украинага Қора денгиздаги ҳарбий амалиётларга мораторий қўйиш бўйича таклифлар берганини айтган эди. Захарованинг таъкидлашича, Россия Туркиядан ҳеч қандай расмий таклиф олмаган.

13-август куни Реутерс агентлиги Украина учинчи томон орқали Россияга таклиф юборганини хабар қилди. Таклифда ҳар икки томон учун Қора денгиздаги фуқаролик обьектларига ҳужумларни тўхтатиш назарда тутилган.

Захарова Туркия воситачилигида тузилган 2022–2023-йиллардаги Қора денгиз ғалла ташаббусига қайтишнинг иложи йўқлигини айтди. Ушбу келишув йирик ғалла экспортчилари бўлган Россия ва Украинага жаҳон бозорларига маҳсулот етказиб беришни давом эттиришга имкон берган эди.

Матбуот котиби бу битимни бирёқлама деб атади. Унинг айтишича, келишув Россиянинг Украина ва Ғарбни шартнома шартларига риоя қилмасликда айблаганидан сўнг бузилган.