Россия Украинани «музлатмоқчи», Украина: «Нефт заводлари оловида исинамиз»
Россия Мудофаа вазирлиги Украинага қишда «музқотиш» таҳдидини очиқдан-очиқ йўллаганидан сўнг Украина Қуролли кучлари унга жавоб қайтарди. Киев Россия нефтни қайта ишлаш заводларига зарбалар билан жавоб беришини билдирди.
Россия Украинани «музлатиш» ниятида эканлигини билдирганида, Украина «нефт заводлари оловида исинамиз» дея жавоб қайтарди.
14-август куни Россия Мудофаа вазирлиги ўзининг Телеграм-каналида дронлар тасвири акс этган ва «Қишда сизни музқотиш кутмоқда» ёзувли постни эълон қилди. Бу хабар «Украина Қуролли кучлари манфаатлари йўлида фойдаланилаётган порт инфратузилмаси ва денгиз кемаларига» берилган зарбалар ҳақидаги маълумотдан сўнг пайдо бўлди.
Бир неча соат ўтиб, Украина Қуролли кучлари Стратегик коммуникациялар маркази ўз каналида Россия ҳарбий идорасига жавобан шундай баёнот берди: «Россиянинг нефтни қайта ишлаш заводлари олови билан исинамиз».
Шу куни Россия Ташқи ишлар вазири Сергей Лавров ҳозирги тўқнашув чизиғида жанговар ҳаракатларни тўхтатишга йўл қўйиб бўлмаслигини таъкидлади: «Гап бугун кимнингдир қандай қулай яшаётганида эмас, бизнинг одамларимиз азоб чекмоқда, бу террорчилик ҳаракатларидан ҳалок бўлмоқда. Гап… Россия давлатининг минг йиллик тарихи олдидаги масъулиятимиз ҳақида бормоқда». Лавров Россиянинг Украинага қарши ҳаракатларини кучайтиришини айтиб, «Биз буни аллақачон қилмоқдамиз. Улар инграй бошлади», – дея қўшимча қилди.
Бир кун аввал, 13-август куни, Реутерс агентлиги ўз манбасига таяниб хабар беришича, Украина учинчи томон орқали Россияга Қора денгиздаги фуқаролик объектларига ҳужумларни ўзаро тўхтатиш таклифини юборган. Бунинг сабаби, минтақадаги жанговар ҳаракатлар глобал озиқ-овқат таъминоти занжирларини хавф остига қўйган.
Бундан бир неча кун олдин Туркия Ташқи ишлар вазири Ҳоқон Фидон Анқара Киев ва Москвага Қора денгиздаги тижорат кемаларига зарба беришга мораторий жорий этиш механизмини яратиш бўйича таклифлар йўллаганини айтганди. Бироқ, 14-август куни Россия ТИВ вакили Мария Захарова «Россия томони расмий каналлар орқали бу ташаббус шартларини аниқлаштирувчи расмийлаштирилган турк мурожаатини олгани йўқ», – деб баёнот берди.
Июн ойида Украина президенти Володимир Зеленский Владимир Путинга очиқ мактуб эълон қилиб, унда етакчиларнинг бевосита учрашувини ҳамда музокаралар давомида бутун фронт чизиғи бўйлаб ўт очишни тўхтатишни таклиф қилган эди.
2022-йилдан бошлаб ҳар кузда Россия Қуролли кучлари қишда мамлакатни электр энергияси ва иссиқликдан маҳрум қилиш мақсадида Украинанинг энергетика инфратузилмасига зарбаларни кучайтириб келади. Жумладан, 2024-йил кузида Россия деярли барча йирик иссиқлик электр стансияларига зарар етказиб, Украинанинг умумий электр ишлаб чиқариш қувватларининг қарийб 80 фоизини ишдан чиқаришга муваффақ бўлди. Келгуси қиш арафасида Россия Қуролли кучлари асосан Суми, Чернигов ва Харков вилоятларидаги электр тармоқлари инфратузилмасини (нимстансиялар ва электр узатиш линияларини) вайрон қилишга эътибор қаратмоқда.