«Россия Украина масаласида ўзини яхши тутмоқда» – Трамп яна Зеленскийга ҳужум қилди
У Путин ва Си Жинпинг билан уч томонлама саммит ўтказилишига ҳам қарши эмас.
«Россия Украина масаласида ўзини яхши тутмоқда» – Трамп яна Зеленскийга ҳужум қилди
АҚШ президенти Доналд Трамп Володимир Зеленскийни яна бир бор кескин танқид қилиб, уни Россия билан урушни якунлашни истамасликда айблади. Шунингдек, у Россия президенти Владимир Путин ва Хитой раҳбари Си Жинпинг қатнашадиган уч томонлама учрашув ўтказиш ғоясини ҳам маъқуллади. Трампнинг бу янги баёнотлари АҚШ ва Украина муносабатлари кескин совиган паллада янгради.
Душанба куни журналистлар Трампдан Зеленскийнинг Америка ҳукумати Украинага қарши урушда Россияни қўллаб-қувватласа, «тарихнинг нотўғри томонида бўлиши» ҳақидаги гапларига муносабатини сўрашди.
«Зеленский шундай дедими? Зеленский нима деяётганини ўзи билмайди. Зеленский – урушни аллақачон ҳал қилиши керак бўлган одам. Агар у менга қулоқ солганида эди, анча вақт олдинроқ яхшироқ келишувга эришган бўларди», – деди Трамп жавобан.
У «энди Украина номидан бошқа кимдир музокаралар олиб бориши вақти келгани»ни ҳам қўшимча қилди. «Агар у гапимга қулоқ солганида – Овал кабинетда нима бўлганини эслайсиз-ку – аллақачон барчасини ҳал қилган бўларди. Балки Зеленскийга музокаралар олиб бориш учун бошқа одамни топиш вақти келгандир», – дейди Трамп.
2025-йил февралида Оқ уйдаги Овал кабинетда АҚШ президенти ва Зеленский учрашуви чоғида кескин тортишув юз берганди.
Ўшанда Трампнинг Украина президентидан асосий талаби зудлик билан ўт очишни тўхтатиш бўлганди. Зеленский аввалига бунинг учун Киевга самарали хавфсизлик кафолатлари кераклигини айтганди, бироқ Оқ уйдаги воқеадан кўп ўтмай Украина ҳукумати ўт очишни тўхтатишга тайёрлигини билдирди. Аммо Россия бу таклифни рад этди.
Трампдан Украинага разведка маълумотларини етказишда кузатилаётган узилишлар ҳақида ҳам сўрашди.
Ўтган ҳафтада Зеленский АҚШ Киевни Россиянинг ракета зарбалари ҳақида ўз вақтида огоҳлантирмаганини айтган эди. Якшанба куни эса НБС телекомпаниясига берган интервюсида разведка маълумотлари алмашинуви тикланганини билдирди, бироқ душанба куни Украина яна Киев баллистик ракеталар билан ўққа тутилаётгани ҳақида тўлиқ маълумот ололмаганидан шикоят қилди.
«Ҳа, биз разведка маълумотларини беряпмиз, – деди бу ҳақда Трамп. – Биз Украинага жуда кўп нарса берамиз. Ва биласизми нима? Биз Украинага жуда кўп нарса берамиз, улар эса бизга ҳеч нарса бермайди».