Россия таъсирини кенгайтиришга интилар экан, Африкада янада кўпроқ маданий марказларини очади
Бу марказлар рус тили, таълим, фан ва маданиятни тарғиб қилади.
Россия ўз таъсирини кенгайтириш устида ишлар экан, Африка бўйлаб маданий марказларини кўпайтиришни режалаштирмоқда
Баъзи «Рус уйлари» Африкада, жумладан, Мали, Буркина-Фасо ва Нигер каби муҳим иттифоқчи давлатларда аллақачон фаолият кўрсатмоқда
Россия қитъадаги ҳарбий ва хавфсизлик соҳасидаги ҳамкорликдан ташқари алоқаларни чуқурлаштиришга интилар экан, Африкадаги маданий ва таълим марказлари тармоғини кенгайтирмоқда.
Россия гуманитар агентлиги маълумотларига кўра, марказлар рус тили, таълими, илм-фани ва маданиятини тарғиб қилади, шунингдек, қатор лойиҳаларни қўллаб-қувватлайди.
«Рус уйлари» деб номланган 11 та янги марказдан саккизтаси Африкада очилиши режалаштирилган бўлиб, у ерда йиллар давомида аллақачон 16 та шундай марказ ташкил этилган.
«Вагнер» гуруҳининг ёлланма аскарлар операцияларини ўз зиммасига олган Россия давлат назоратидаги «Африка корпуси» ярим ҳарбий тузилмаси Ғарбий Африкадаги бир нечта ҳарбий ҳукуматлар учун жиҳодчилар исёнига қарши курашда муҳим хавфсизлик ҳамкорига айланди.
Мали, Нигер ва Буркина-Фасодаги хунталар, айниқса, собиқ мустамлакачи ҳукмдор Франция таъсиридан қутулишга ҳаракат қилар экан, ҳозирда «Африка корпуси» деб аталувчи Россия ёлланма аскарларига мурожаат қилишди.
Франция ва бошқа халқаро аксилжиҳодчи кучлар, жумладан, БМТнинг Малидаги миссияси (у 2023 йил декабрида якунланди) бу мамлакатлардан чиқиб кетди.
Бу йил, шунингдек, Россия-Украина урушига жалб қилинган африкалик жангчилар сони ортгани ҳақида хабарлар берилди. Энг кўп ёллаш ҳолатлари қайд этилган Кения ишга жойлаштириш агентликларини эркакларни иш ваъда қилиб Россияга жалб қилишда, оқибатда эса улар Украинада жанг қилиб қолаётганида айблади.
Россия барча хорижлик ёлланма аскарлар «Россия қонунчилигига тўлиқ мувофиқ равишда» ихтиёрий равишда қўшилганини билдирди, бироқ март ойида кенияликларни фронтга юбормасликка рози бўлди.
Россиянинг «Россотрудничество» гуманитар агентлигига кўра, мамлакат эндиликда стипендиялар, университетлар, тил дастурлари, маданий тадбирлар ва алмашинувлар орқали узоқ муддатли алоқаларни ўрнатмоқчи.
«Биз дастурнинг ўзини сезиларли даражада ўзгартирмоқдамиз. Ишимиз шиддатини ва назорат даражасини оширяпмиз», деди «Россотрудничество» раҳбари Игорь Чайка.
Янги марказлар Конго Демократик Республикаси, Кения, Мадагаскар, Мали, Сан-Томе ва Принсипи, Сенегал, Сьерра-Леоне ва Тогода очилиши режалаштирилган.
Чайка Россия «рус тили, рус таълими, илм-фани ва маданиятини» тарғиб қилишда «сезиларли натижаларга» эришишга интилаётганини қўшимча қилди.
«Россотрудничество» хориждаги таълим, маданий, илмий, технологик ва ёшлар лойиҳаларини қўллаб-қувватлаш учун 2027 йилда янги микрогрантлар дастури бошланишини маълум қилди.
Агентлик, шунингдек, Африканинг турли мамлакатларида «Рус уйлари»ни бошқариш учун кучлироқ ҳамкор ташкилотларни жалб қилишни ва шу орқали ўзи «тўлақонли халқаро тармоқ» деб атаган тизимни яратишни хоҳлайди.
Қўшимча қилинишича, ҳамкор «Рус уйлари»га бўлган талаб, жумладан, давлат муассасалари фаолияти сиёсий чекловларга дуч келган мамлакатларда ҳам ортиб бормоқда.
Эълон яна 11 та ҳудудни, жумладан, Арманистондаги иккита, шунингдек, Таиланд ва Африканинг саккизта давлатидаги жойларни қамраб олади.
Чайка улар, айниқса, таклиф этилаётган таълим дастурларини такомиллаштиришга эътибор қаратаётганини айтди: «Биз мамлакатга ким кераклигига эътибор қаратишимиз лозим.
Агар унга шифокорлар керак бўлса, биз шифокорларни тайёрлашимиз керак; агар бошқа соҳаларда мутахассислар керак бўлса, ўша мутахассисларни тайёрлашимиз керак».
У, шунингдек, хорижлик талабаларнинг Россияда таҳсил олгандан сўнг ватанларига қайтиши муҳимлигини таъкидлаб, улар ўз мамлакатларининг иқтисодий ривожланишига ёрдам бериш учун янги орттирган кўникмаларидан фойдаланишлари мумкинлигини айтди.
Ушбу кенгайишни қўллаб-қувватлаш учун «Россотрудничество» Африка мамлакатлари билан иқтисодий ҳамкорлик ассоциацияси (АЭКАС) билан алоҳида битим имзолаганини маълум қилди.
Бу Россия Президенти Владимир Путин томонидан 2020 йилда ташкил этилган Россия-Африка савдо ва бизнес алоқалари органи бўлиб, Россиянинг Ғарбдан ташқаридаги мамлакатлар билан алоқаларни сақлаб қолиш ва ривожлантириш борасидаги кенгроқ саъй-ҳаракатларининг бир қисмидир.