Россия Олий суди «Яблоко» партиясини сайловдан четлатиш қарорини кучда қолдирди

Россия Олий суди "Яблоко" партиясининг сайловда иштирок этишини тақиқловчи қарорни ўз кучида қолдирди.

Партиянинг Дума сайловларида қатнашиши 10-август куни тақиқланган эди. Суд бу қарорни "Родина" партиясининг даъвоси асосида қабул қилди. "Родина"нинг даъво аризасида "Яблоко" ўз ташвиқотида муаллифлик ҳуқуқларини бузганлиги ва хориждан молиялаштирилганлиги иддао қилинган.

17-август куни "Яблоко"нинг апелляция шикояти кўриб чиқилаётган суд мажлиси вақтида Олий суд биноси олдида 85 нафардан ортиқ киши полиция томонидан қўлга олинди. Якунда суд қарор устидан берилган шикоятни рад этди.

Давлат Думасига сайловлар 2026-йил 20-сентябрда бўлиб ўтади. "Яблоко" Россияда сайловларга "Тинчлик ва эркинлик учун!" деган урушга қарши шиор билан бораётган ягона партия эди.

"Медуза" нашрининг президент Путин маъмуриятига яқин манбалари 2025-йилнинг кузидаёқ "яблокочилар" бундай шиор билан федерал даражадаги сайловда қатнаша олмаслигини айтган эди. Президент маъмуриятининг сиёсий блоки дастлаб Дума кампаниясини "консерватив ссенарий бўйича", яъни бошқариладиган иштирокчилар билан ўтказишни режалаштирган. "Медуза" манбаларига кўра, "Яблоко" сайловда қатнашиш учун рўйхатга олинган, бироқ партия рейтинги ўса бошлагач, "хатарларнинг олдини олиш" мақсадида четлатилган.