Россия Киевга баллистик ракеталар билан зарба берди
Россия қўшинлари 30-сентабрга ўтар кечаси Киев ва Киев вилоятига ракета ҳамда дронлар билан ҳужум қилди. Украина расмийларига кўра, Вишгородда вайрон бўлган хусусий уй остидан бир боланинг жасади топилган, яна уч киши тирик қутқарилган.
Россиядан Киевга баллистик ракеталар билан зарба берилди
ДВ маълумотига кўра, Киев вилояти ҳарбий маъмурияти раҳбари Тимур Ткаченко Вишгородда вайроналар остидан бир эркак, бир аёл ва яна бир бола тирик ҳолда чиқарилганини билдирган. Уларга тиббий ёрдам кўрсатилмоқда.
Ткаченконинг айтишича, вилоятнинг Вишгород туманида бир нечта хусусий уйга зарар етган ва улар вайрон бўлган. Турар жойлар ҳамда гаражларда ёнғин чиққан.
Буча туманида учта хусусий уй, 11 та автомобил ва иккита омборхона зарарланган. Бу ҳудудда ҳам ёнғин юз берган. Шунингдек, Буча, Вишгород ва Обухов туманларидаги инфратузилма обьектларида ҳужум оқибатлари қайд этилган.
Киевнинг ўзи ҳам шу кеча баллистик ракеталар билан нишонга олинган. Шаҳар мери Виталий Кличконинг айтишича, Святошин туманида хусусий турар жойлар ҳудудида, Оболон туманида дўконда, Голосеев туманида эса омбор биносида ёнғин чиққан.
Кличко Киевда икки киши жароҳат олганини, улардан бири — аёл шифохонага ётқизилганини маълум қилган.
Киев ва унинг атрофи бир неча кундан бери ҳужум остида
27-сентабр куни Киев яқинидаги Софиевская Борщаговка қишлоғида жойлашган «Столичний» бозорига дрон урилган. Украина расмийларига кўра, икки киши ҳалок бўлган, яна 10 киши яраланган. Шу куни Киевнинг бир нечта тумани ҳам дронлар ҳужумига учраб, ўнлаб одам жабрланган.
28-сентабрга ўтар кечаси Украина пойтахтига яна дронлар билан ҳужум қилинган ва бир неча киши яраланган. Кундузи эса Украина Миллий фанлар академияси биноси зарбага учраб, кучли ёнғин чиққан. Кличко 28-сентабрдаги ҳужумлар оқибатида Киевда икки киши ҳалок бўлгани ва 26 киши жабрланганини билдирган.
29-сентабрга ўтар кечаси ҳам пойтахтга ракета ва дронлар билан зарба берилган. Ракета парчалари турар жой яқинига, дрон эса йўлнинг қатнов қисмига тушган. Ўша ҳужумда ҳалок бўлганлар ёки жабрланганлар ҳақида маълумот келиб тушмаган.