Россия Киевдаги асосий кўприкка зарба берди
Украина пойтахтини икки қисмга ажратиб турувчи Днепр дарёси устидан ўтган кўприк ёпилгач, шаҳарда улкан тирбандликлар юзага келган.
Россиядан Киевдаги асосий кўприкка зарба берилди
Россия қўшинлари Киевга дронлар билан ҳужум қилишни давом эттирмоқда. 1-октабр куни дронлардан бири Соломенск раёнидаги мактаб биносига бориб урилди. Ўша пайтда ўқувчилар ертўладаги бомбапанагоҳларга тушиб улгурган эди ва ҳеч ким жабрланмади.
Кундузи РФ ҳарбийлари кенг кўламли уруш бошланганидан бери илк марта Киевдаги кўприкларни нишонга олиб ҳужум бошлади. Кун давомида Жанубий кўприкка уч марта зарба берилди — бу кўприкдан автомобиллар билан бирга метро ҳам ўтади.
Портлаш тўлқини сабаб шу вақтда кўприкдан ўтаётган поезд вагонларига вентиляция орқали чанг кирган. Йўловчилар зарар кўрмади, поезд ҳам шикастланмади, бироқ қўшимча текширув учун депога юборилди.
Дастлаб кўприк орқали метро ва автобуслар қатнови тўхтатилди. Киев шаҳри ҳарбий маъмурияти маълумотига кўра, метро поездлари фақат «Сирец» ва «Видубичи» ҳамда «Осокорки» ва «Красний хутор» стансиялари орасидаги ер ости участкалари бўйлаб ҳаракатланади. Автобус йўналишлари вақтинча ўзгартирилди.
Мутахассислар зарбалар оқибатида етган зарарни аниқлаш учун кўприкни текширмоқда. Дастлабки маълумотларга кўра, «кўприк устуни, йўл четидаги тўсиқ, йўл қатлами ва метрополитеннинг ҳимоя бетон қатлами шикастланган».
2-октабр тонгида Патона кўприги бўйлаб ўнг соҳилдан чап соҳилдаги йўналишда, шунингдек Метро кўпригида транспорт ҳаракати чеклаб қўйилди. Шу сабаб шаҳарда катта тирбандликлар юзага келди. 2-октабр куни кундузи Патона кўпригида икки томонлама ҳаракат тикланди, бироқ ҳозирча унга фақат Микола Михновский булвари томондан кириш мумкин. Киев мудофаа кенгаши шошилинч йиғилиш чақирди, унда шаҳарнинг чап ва ўнг соҳил қисмларини боғловчи кўприкларда ҳаракатни қандай ташкил этиш масаласи муҳокама қилинади. Днепр дарёсида транспорт учун ерости ўтиш туннели мавжуд эмас.