Россия америкалик собиқ аскар Гилманни “гуманитар сабабларга кўра” озод қилди
Аввалроқ Вашингтон Москвани америкалик фуқарони ватанида даволаниши учун озод қилишга чақирган эди.
Россия ҳукумати Воронеж колониясида жазо муддатини ўтаётган 32 ёшли америкалик собиқ денгиз пиёдаси Роберт Гилманни озодликка чиқарди. Реутерс агентлигининг хабар беришича, Россия президенти Владимир Путин Гилманни "гуманитар сабабларга кўра" афв этган. Аввалроқ Вашингтон Москвани америкалик фуқарони ўз ватанида даволаниши учун озод қилишга чақирган эди.
Гилманнинг оиласи унинг аҳволидан жиддий хавотирда эди, чунки у қийноқлар ва онгни ўзгартирувчи дорилар юборилаётганидан шикоят қилган. Яқинларининг сўзларига кўра, Гилман июн ойидан бери руҳий тушкунликка тушиб қолган ва зонд орқали овқатлантирилаётган эди. Унинг синглиси акасининг ўлим ёқасида бўлиши мумкинлигини тахмин қилган.
Реутерс манбаларининг маълумотларига кўра, 11-август куни Гилман уни Вашингтонга олиб кетиши керак бўлган Давлат департаменти самолёти бортида бўлган. Агентлик суҳбатдошларидан бири собиқ маҳбусни кўрганини ва унинг юргани ҳамда гапирганини тасдиқлаган.
Гилманнинг россиялик адвокати Ирина Бражникова "Интерфакс"га унинг озод этилиши эҳтимоли ҳақида маълумотга эга эмаслигини, бироқ буни истисно этмаслигини билдирган. "Мен ҳеч нарса билмайман, лекин катта эҳтимол билан шундай. Менга ҳали ҳеч ким хабар бергани йўқ. Маълумотларимга кўра, у шифохонада қолмоқда (июл ойи бошида Гилман фуқаролик шифохонасининг психиатрия бўлимига ўтказилган эди) ва мени ҳамон унинг олдига киритишмаяпти", - деган у.
Кейинроқ Гилманнинг озод этилганини Россия президентининг махсус вакили Кирилл Дмитриев ва АҚШ етакчиси Доналд Трамп ҳам тасдиқлади.
32 ёшли Роберт Гилман Россияда ҳибсда сақланаётган камида ўн нафар америкаликдан биридир. У 2022-йил январ ойида Россиянинг Воронеж шаҳрида полициячи билан бўлган можародан сўнг қўлга олинган. Россия ҳукумати уни полиция ходимига ҳужум қилишда айблаган. Дастлаб у 4,5 йил қамоқ жазосига ҳукм қилинган. Кейинчалик унга нисбатан ахлоқ тузатиш муассасаси ходимларига ҳужум қилишда янги айбловлар пайдо бўлган ва умумий жазо тахминан 10 йилга оширилган.