Россия 2027-йилда мудофаага 178 миллиард евро сарфламоқчи

Россия 2027-йилда мудофаага 178 миллиард евро сарфлашни режалаштирмоқда

Реутерс агентлиги 28-сентабр куни танишган ҳукумат ҳужжатларига таяниб, шу ҳақда хабар берди.

Ҳужжатларга кўра, Россиянинг келгуси уч йилдаги жами мудофаа харажатлари 50 триллион рублни ташкил этади. 2026-йил учун эса мудофаа эҳтиёжларига 12,1 триллион рубл ажратиш кўзда тутилган эди.

Реутерс амалдаги харажатлар ҳажми махфий эканини таъкидлаган. Ҳарбий харажатларнинг бир қисми бюджетнинг бошқа бўлимларига ҳам киритилган бўлиши мумкин.

Россия ҳукумати 2026-йил учун бюджет тақчиллиги прогнозини ялпи ички маҳсулотнинг 1,6 фоизидан 3,2 фоизига оширди.

Жорий йилда бюджет харажатлари 13,2 фоизга кўпайиб, 48,6 триллион рублга, яъни ЯИМнинг 20,9 фоизига етиши кутилмоқда.

Бюджет тўғрисидаги қонун лойиҳаси 1-октабр куни Давлат думасига тақдим этилиши керак.

Ўтган ҳафта, сайловлардан кейин, Россия расмийлари 2027-йилда солиқларни яна ошириш режалари ҳақида маълум қилган.

Хусусан, тоғ-кон ва металлургия мажмуасининг айрим сегментлари ҳамда ўғит ишлаб чиқарувчиларнинг ўта юқори даромадларига янги солиқ жорий этиш орқали йилига қарийб 200 миллиард рубл қўшимча тушум олиш кутилмоқда.

Ҳужжатларга кўра, 2027-йилда соф қарз олиш режаси 26 фоизга оширилиб, 5 триллион рублга етказилади. Бюджет тақчиллигини камайтириш учун Миллий фаровонлик жамғармасидан 459 миллиард рубл ажратиш ҳам режалаштирилган. Бу жамғарманинг ликвид қисмининг тахминан 11 фоизига тенг.

Россия ҳукумати 2026-йилда нефт ва газдан олинадиган даромадлар прогнозини аввал кутилган 8,9 триллион рублдан 7,6 триллион рублга пасайтирган.

Давлат қарзи 2026-йилдаги ЯИМнинг 19,9 фоизидан 2027-йилда 21,7 фоизигача ошиши кутилмоқда. Бу Россия расмийлари хавфсиз деб ҳисоблайдиган 20 фоизлик даражадан юқори.