Роналдунинг никоҳи ҳақидаги миш-мишлар сабаб 2 мингдан ортиқ мухлис бегона тўйга келди (видео)
**Роналдунинг никоҳи ҳақидаги миш-мишлар туфайли 2 мингдан ортиқ мухлис нотаниш жуфтликнинг тўйига келди (видео)**
Ўтган шанба, 8-август куни Криштиану Роналдунинг тўйини кутган икки мингдан ортиқ мухлис унинг туғилган шаҳри – Мадейра оролидаги Фуншал соборини ўраб олди. Бироқ, ўша куни черковда икки нафар маҳаллий фуқаро – Фабио Рамос ва Фотима Никол Куня Тейшейра никоҳдан ўтаётган эди.
8-август куни эрталаб таблоидлар Роналду ва унинг севгилиси Жоржина Родригеснинг шу ерда турмуш қуриши ҳақида ёлғон хабарлар тарқатганидан сўнг, собор олдида катта оломон тўпланди. Маҳаллий ОАВнинг ёзишича, жуфтлик тўй базми учун собор яқинидаги беш юлдузли Савой Паласе меҳмонхонасини ҳам банд қилиб қўйган.
Аммо мухлислар футболчининг эмас, балки Фабио Рамос ва Фотима Никол Куня Тейшейраларнинг никоҳ маросимига ташриф буюрди. Ёш келин-куёв қариндошлари ва дўстлари билан бирга никоҳ ўқиладиган соборга кириш учун оломонни ёриб ўтишга мажбур бўлди.
Меҳмонлардан бири шундай деди: “Бу ақлга сиғмайди. Нега ҳамма Фабиони Криштиану Роналду деб ўйлаяпти? Келин бу тартибсизлик тўйини бузиб қўйишидан қўрқиб, жуда хафа бўляпти”.
Фуншал собори руҳонийси Маркос Гонсалвес ўша куни бошқа маросимлар режалаштирилмаганини тасдиқлади: “Бугун бу ерда бўлиб ўтадиган ягона никоҳ маросими шу. Менда Криштиану Роналду учун буюртма йўқ”.
Роналдунинг ўзи эса бу воқеага муносабат билдириб, ижтимоий тармоқлардаги никоҳ маросими видеоси остида кулаётган смайликлар қолдирди.
Эслатиб ўтамиз, Роналду ва Родригес 2016-йилдан бери бирга бўлиб, беш нафар фарзандни тарбиялайди: кичик Криштиану, суррогат онадан туғилган эгизаклар Ева ва Матео, ҳамда икки қизи — Алана Мартина ва Белла Эсмералда. Жуфтлик ўтган йилнинг август ойида унаштирилганини эълон қилганди. Ўшанда Жоржина Родригес ҳашаматли никоҳ узугини кўрсатиб, Криштиануга розилик берганини маълум қилганди. Шундан сўнг футболчи қайлиғини бир неча бор қимматбаҳо совғалар — Порсче Тайсан электромобилидан тортиб, эксклюзив соатлар, дизайнерлик сумкалари ва кийимлари билан хурсанд қилганди.