Рожер Федерер катта спортга қайтадими?
Рожер Федерер катта спортга қайтадими?
"Катта дубулға" туркумидаги турнирларнинг 20 карра ғолиби, швейсариялик афсонавий теннисчи Рожер Федерер Ню-Ёркдаги "Артур Эш" кортига қайтмоқда. 45 ёшли собиқ теннисчи УС Опен турнири доирасида ўтказиладиган кўргазмали баҳсда иштирок этади. Бироқ у профессионал спортга қайтмайди.
2004–2008-йилларда кетма-кет беш марта АҚШ очиқ чемпионатида ғалаба қозонган Федерер охирги марта ушбу кортда 2019-йилда ўйнаган эди. Матбуот анжуманида журналистлар ундан опа-сингил Уилямслар (Венус ва Серена) сингари катта турнирларга қайтиш режаси бор-йўқлиги ҳақида сўрашганида, Федерер шундай жавоб берди:
"Йўқ, ундай эмас. Ушбу саволни берганингиз учун раҳмат. Кимдадир шундай фикр пайдо бўлган бўлса, масалага ойдинлик киритиб олганимиз яхши бўлди."
Федерер 2021-йилги Уимблдон чорак финалида Хуберт Хуркачга имкониятни бой бергандан буён бирорта расмий яккалик баҳсларида кортга чиқмаганига урғу берди:
"Беш йилдан бери яккалик баҳсларида ўйнамадим. 25-август кунги учрашув қандай кечишини аниқ билмайман. Мавҳумликлар кўп, аммо фаолиятимдаги энг гўзал лаҳзалар ўтган "Артур Эш" кортига қайтаётганимдан жуда хурсандман."
2019-йилги чорак финалдаги мағлубиятидан сўнг у бир неча бор тиззасидан жарроҳлик амалиётини ўтказди ва фаолиятини якунлашга мажбур бўлди.
"Тиззам ортиқ бунга бардош бера олмасди, чарчаган эди. Руҳий жиҳатдан ҳам яна бир неча йил кутишга ва сабр қилишга кучим қолмаган эди", дейди Федерер.
Ню-Ёркдаги ушбу кўргазмали турнирдан сўнг Рожер Федерер Род-Айленд штатининг Нюпорт шаҳрига йўл олади. У ерда теннисчини Халқаро шон-шуҳрат залига (Интернатионал Теннис Ҳалл оф Фаме) кириши муносабати билан махсус тадбир бўлиб ўтади.