Рим папаси Лурдга ташрифи чоғида суиистеъмолчилик «балоси» таг-томири билан йўқ қилиниши кераклигини айтди

Рим папаси Лурдга ташрифи чоғида суиистеъмолчилик «балоси» таг-томири билан йўқ қилиниши кераклигини айтди

Рим папасининг Францияга тўрт кунлик ташрифи чоғидаги нутқини тинглаш учун юз минглаб одамлар йиғилди

Рим папаси Лео франциялик епископларни Рим-католик черковидаги жинсий зўравонлик «балосига» барҳам беришга чақирди ва зўравонликдан омон қолганлар билан учрашишдан олдин уларни «энг юқори ҳушёрликни сақлашга» ундади.

У ушбу мурожаатни Францияга тўрт кунлик расмий ташрифининг учинчи кунида, Франция жанубидаги муқаддас қадамжо — Лурддаги Муқаддас Биби Марям ибодатхонасида епископлар билан бўлиб ўтган шахсий қабулда қилди.

2021 йилги суриштирув натижаларига кўра, Францияда 70 йил давомида черков руҳонийлари ёки дунёвий аъзолари томонидан 330 000 га яқин бола жинсий зўравонликка учраган.

Рим папаси Лурдда минглаб диндорлар иштирокида ибодат маросимини ўтказди, шундан сўнг зўравонликдан омон қолганлар билан ёпиқ эшиклар ортида учрашиши режалаштирилган.

Ибодат маросимидан олдин у епископларга шундай деди: «Сиз руҳонийлар томонидан ёки черков муҳитида содир этилган вояга етмаганларни суиистеъмол қилишдек оғриқли балога қарши қатъият билан курашдингиз.

Бошлаган йўлингиздан оғишмай, энг юқори ҳушёрликни сақлаган ҳолда давом этишингиз муҳимдир».

Черковнинг юқори мартабали раҳбарлари ёпиқ эшиклар ортида учрашишди ва кейинчалик бу баёнотлар журналистларга маълум қилинди.

Лурддаги тадбир Париждаги Конкорд майдонига понтификнинг нутқини тинглаш учун тахминан 700 000 киши йиғилганидан бир кун ўтиб содир бўлди.

У усти очиқ папамобилида Елисей майдони бўйлаб ҳаракатланар экан, йиғилган катта оломон уни олқишлади ва қўл силкитди.

Жума куни Рим папаси Франция Президенти Эммануэль Макрон билан ҳам учрашди.

Шанба куни Парижда бўлиб ўтган ибодат маросимида Рим папаси диндорларга католиклар ўз эътиқодларини фақат ўзларида сақлаб қолмасликлари, балки «уни атрофга таратсинларки, сиз учратган одамлар ундан баҳраманд бўлишсин», деди.

«Сизнинг ғайрат-шижоатингиз, куч-қувватингиз ва фидойилигингизни, шунингдек, христиан жамоаларига олиб келаётган қувончингизни кўриш нақадар гўзал», деди у.

Францияда мунтазам ибодат қилувчилар сони 1960 йилдаги аҳолининг 35 фоизидан бугунги кунда 5 фоиздан камроққа тушиб кетди, руҳонийлар сони эса уч бараварга камайиб, 1990 йилдаги 25 000 дан 9 000 дан камроқни ташкил этмоқда.

Бироқ сўнгги йилларда диний анъаналарга қизиқиш қайта тикланаётгани кузатилмоқда, катта ёшлиларни чўқинтириш сони беш йил ичида икки баравардан кўпроққа ошиб, 2025 йилда 10 000 тага етди.

Якшанба куни кечроқ Рим папаси Лурддаги тиббиёт муассасаси ходимлари ва беморлари билан учрашади, сўнгра кечқурун машъалалар юришига қўшилади.

Бу Рим папасининг 2025 йил май ойида Рим-католик черкови раҳбари этиб сайланганидан бери Францияга амалга оширган илк расмий ташрифидир.

Рим папалари дунёвий замонавий сиёсий тарихга эга, аммо чуқур католик илдизларига эга бўлган Францияга мунтазам равишда ташриф буюриб туришади.