Репер Масклеморе Фаластинни қўллагани учун Эд Шираннинг гастролидан четлаштирилди
Қолган гуруҳлар ҳам бирдамлик белгиси сифатида турни тарк этишди.
Репер Масклеморе Фаластинни қўллаб-қувватлагани сабаб Эд Шираннинг гастролидан чиқариб юборилди
Эд Ширан 2026-йил январидан бери ўзининг саккизинчи «Плай» албоми учун дунё бўйлаб Лооп номли консерт гастролини давом эттирмоқда. Ҳозиргача хонанда Австралия, Янги Зеландия, Европа ва АҚШдаги бир қатор майдонларда чиқиш қилган.
Тур давомида Ширанга консерт пайтида томошабинларни руҳлантириш учун бир нечта ижрочилар ҳамроҳлик қилмоқда. Улардан бири — репер Масклеморе (асл исми Бен Ҳаггерти) — 4-сентабр куни Ню-Жерсида бўлиб ўтган консертда қўшиқлар орасида Фаластинни қўллаб қисқа нутқ сўзлади. У саҳнада туриб, Ғазо ва ишғол этилган Ғарбий соҳил аҳолиси улар «унутилмагани»ни билишини исташини айтди:
Бу турга боришни хоҳлаганимнинг асосий сабабларидан бири — шундай стадионларга чиқиш ва юрагимга жуда яқин ва қадрли бўлган икки сўзни айтиш имкониятидир: «Фаластинга озодлик!»
Кейинги куни мусиқачи яҳудий тингловчиларга мурожаат қилиб, шундай деди: «Исроил, апартеид ва геноцидни танқид қилиш сизга қарши танқид эмас».
Шундан сўнг, Шираннинг АҚШдаги турини ташкил қилаётган Мессина Тоуринг Гроуп компанияси консерт майдонлари эгаларидан Масклеморе иштирокидаги чиқишга рухсат бермаслик ҳақида билдиришномалар ола бошлади. Ширан консерт бериши режалаштирилган Филаделфия, Бостон, Атланта, Шарлотта, Индианаполис, Даллас ва Тампадаги стадионлар вакиллари ҳам бунга қарши чиқди.
Натижада Масклеморе гастрол таркибидан чиқарилди, қолган ижрочилар эса бирдамлик белгиси сифатида ўз иштирокларини тўхтатишди. Аввалига ирландиялик қўшиқчи Аарон Роу ҳамда ирландларнинг Беога номли гуруҳи (асосий консертда Ширан билан бирга бир неча қўшиқ ижро этадиган гуруҳ) шундай қарорга келганини маълум қилди. «Ирландлар сифатида биз геноцид, мажбурий очарчилик ва шафқациз оккупация ҳақида жуда яхши биламиз», – деб ёзди Роу. Шунингдек, данияликларнинг Лукас Граҳам гуруҳи ва америкалик мусиқачи, қўшиқчи Билли Айлишнинг акаси бўлган Финнеас ҳам гастролга қўшилмасликни танлади.
Кейинроқ Ширан Масклемореъни четлатиш ҳақидаги қарор турнинг Америкадаги қисми промоутери Мессина Тоуринг Гроуп томонидан қабул қилинганини айтди. Шу билан бирга, хонанда «Масклемореънинг ўз эътиқодларини ҳимоя қилиш ва бу ҳақида баланд овозда гапириш қарори»ни ҳурмат қилишини, бироқ «ўз профессионал платформасидан сиёсий баёнотлар учун фойдаланмаслик»ни афзал кўришини таъкидлади.