Рене Гуд: Ички хавфсизлик тергов бошқармаси (ICE) агенти томонидан ўлдирилган АҚШ фуқаросининг оиласи Трамп маъмурияти мулозимларини судга берди

Рене Гуд: Имиграция хизмати агенти томонидан ўлдирилган АҚШ фуқаросининг оиласи Трамп маъмурияти расмийларини судга берди

Рене Николь Гуд иммиграция агентлари томонидан ўлдирилишидан сал аввалроқ Миннеаполисга кўчиб ўтган эди.

Шу йилнинг январь ойида Миннеаполисда иммиграция агенти томонидан ўлдирилган аёлнинг оиласи АҚШ ҳукумати ва Трамп маъмурияти аъзоларига қарши иккита даъво аризаси киритаётганини маълум қилди.

Рене Гуд Иммиграция ва божхона назорати (ICE) ходими томонидан «Метро тўлқини» (Operation Metro Surge) деб номланган, иммигрантлар ва жиноятчиларга қарши қаратилган шаҳар миқёсидаги рейд пайтида ўлдирилган.

Даъволарнинг бирида ҳукумат унинг ўлимида айбланмоқда; даъво аризасида ушбу операция «давлат томонидан қўллаб-қувватланадиган зўравонлик учун мисли кўрилмаган муҳит» яратгани таъкидланади, деди пайшанба куни бўлиб ўтган матбуот анжуманида оила адвокати Антонио Романуччи.

Оқ уй ва Ички хавфсизлик вазирлиги (DHS) ҳозирча ушбу даъволарга муносабат билдирмади.

Бир неча ҳафта ўтгач, Миннеаполиснинг яна бир аҳолиси Алекс Претти иммиграция агентлари томонидан ўлдирилганидан сўнг, Миннесота штатидаги ушбу шаҳардан юзлаб федерал агентлар олиб чиқиб кетилди.

Даъво аризалари Гуднинг шериги Бекка Гуд ва унинг акаси Брент Гангер томонидан киритилган.

Биринчи даъво аризасида ҳукумат «дўппослаш, ҳужум қилиш, ноқонуний ҳибсда сақлаш, қасддан руҳий азоб бериш ва Рененинг ўлимига сабаб бўлган эҳтиётсизлик»да айбланмоқда.

Унда Федерал даъволар тўғрисидаги қонунга (Federal Tort Claims Act) таянилган бўлиб, ушбу қонун фуқароларга федерал ходимларнинг эҳтиётсизлиги оқибатида етказилган жисмоний шикастланиш, ўлим ёки мулкий зарар учун ҳукуматни судга беришга рухсат беради.

Иккинчи даъво аризасида Гудга қарата ўқ узган ICE ходими Жонатан Росс, шунингдек, Оқ уй аппарати раҳбарининг ўринбосари Стивен Миллер, Ички хавфсизлик собиқ вазири Кристи Ноэм, Оқ уйнинг чегара масалалари бўйича раҳбари Том Хоман ва бошқаларнинг исмлари келтирилган бўлиб, унда «юқори лавозимли федерал амалдорлар, федерал иммиграция органлари агентлари ва хусусий шахслар томонидан фуқаролик ҳуқуқларини бузиш мақсадида тил бириктирилгани» даъво қилинади.

Гуд 37 ёшли, уч фарзанднинг онаси бўлиб, яқинда ушбу шаҳарга кўчиб келган эди. У 7 январь куни йўл ҳаракати хавфсизлиги текшируви вақтида отиб ўлдирилган. Иммиграция идораларининг таъкидлашича, бу воқеа у «террорчилик ҳаракати» содир этиб, «агентларни ўлдиришга ёки уларга жисмоний шикаст етказишга уринганидан» кейин юз берган.

Оила аъзолари ва гувоҳларнинг айтишича, у ўз машинаси ичида ўлдирилган пайтда ходимларга ҳужум қилишга уринмаган.

Унинг ўлими бутун мамлакат бўйлаб норозилик намойишларига сабаб бўлди. 24 январь куни Алекс Претти ҳам иммиграция агентлари томонидан отиб ўлдирилганидан кейин намойишлар янада кучайди.

Сешанба куни Гуднинг онаси ва акаси Конгрессда кўрсатма берди.

«У ҳали ҳам тирик бўлиши керак эди. Мен буни яна бир бор айтаман, қизим ҳали ҳам тирик бўлиши керак эди», — деди Гуднинг онаси Донна Гангер қонун чиқарувчиларга.

«Мен рўйхатдан ўтган республикачиман. Мен президент Трампга ушбу агентлар Америка Қўшма Штатлари фуқароларини ҳимоя қилиш учун шу ерда, деган ишонч билан овоз берган эдим», — дея давом этди Гангер.

«Аммо республикачи бўлишдан ҳам кўра кўпроқ мен масиҳийман. Исо бизни кечиришга ўргатади ва мен кечирдим, лекин биз талаб қилаётган нарса — бу жавобгарликдир».