Рекорд трансферлар, Манчестер клублари учун катта синов ва Лемпарднинг қайтиши: АПЛ янги мавсумидан нималар кутилмоқда?

**Рекорд Трансферлар, Манчестер Клублари Учун Катта Синов ва Лемпарднинг Қайтиши: АПЛнинг Янги Мавсумидан Нималар Кутилмоқда?**

Англия Премьер Лигасининг 2026/27-йилги мавсуми 21-август куни старт олади. Бу мавсум нафақат чемпионлик учун юқори ўринлардаги кураш, балки қуйи ўринлар учун кечадиган шиддатли жанглар билан ҳам қизиқарли бўлиши кутилмоқда. Бир қатор топ-клублар янги мураббийлар билан мавсумни бошлайди, "Арсенал" эса узоқ танаффусдан сўнг амалдаги чемпион сифатида ўз унвонини ҳимоя қилади.

**"Арсенал" — Асосий Фаворит**

Опта прогнозларига кўра, чемпионлик учун асосий фаворит "Арсенал" ҳисобланади. Лондон клубининг чемпион бўлиш эҳтимоли 38 фоизга баҳоланмоқда. Микел Артета жамоаси ўтган мавсумда 22 йиллик танаффусдан сўнг Англия чемпионлигини қўлга киритган эди. Энди испаниялик мутахассис олдида бу муваффақиятни такрорлаш вазифаси турибди. АПЛ тарихида чемпионликни кетма-кет икки марта қўлга киритиш фақат Алекс Фергюсон ("Манчестер Юнайтед"), Жозе Моуринё ("Челси") ва Пеп Гвардиолага ("Манчестер Сити") насиб этган.

"Арсенал" ёзги трансферлар вақтида марказий ярим ҳимояни Бруно Гимараеш билан кучайтирди, ҳужум чизиғига эса "Брюгге"дан Христос Тзолис қўшилди. Жамоа мавсум олдидан "Манчестер Сити" устидан ғалаба қозониб, Англия Суперкубогини қўлга киритгани билан яхши спорт формасида эканини кўрсатди. Бироқ Артета учун жиддий муаммо ҳам йўқ эмас. Асосий ҳимоячи Уилям Салиба узоқ муддатга сафдан чиққан. Франсиялик футболчи камида йил охиригача майдонга туша олмайди ва унинг йўқлиги лондонликларнинг ҳимоясига таъсир қилиши кутилмоқда. Шу сабабли, унинг ўрнини босиш мақсадида "Астон Вилла" ҳамда Англия терма жамоаси ҳимоячиси Эзри Консани харид қилди.

**"Манчестер Сити" Янги Даврни Бошлайди**

"Манчестер Сити" 2026/27-йилги мавсумни Пеп Гвардиоласиз бошлайди. Испаниялик мутахассис клубни 10 йил бошқарган ва шу давр мобайнида 20 та совринни қўлга киритган. Унинг ўрнини Энсо Мареска эгаллади. Мареска "шаҳарликлар" учун бегона эмас. У аввал Гвардиоланинг мураббийлар штабида ишлаган, кейинчалик "Лестер"ни Премьер Лигага олиб чиққан ва "Челси"да ҳам бир ярим мавсум фаолият юритган.

Шунга қарамай, янги мураббий олдида мураккаб вазифа турибди. Айни пайтда "Манчестер Сити" яримҳимоя чизиғини қайта шакллантириш билан банд. Клуб аллақачон "Ноттингем Форест"дан Эллиот Андерсонни 116 миллион фунт эвазига сотиб олди. Шу билан бирга, жамоанинг асосий таянч яримҳимоячиси Родри 65 миллион фунт эвазига "Барселона"га ўтди. Испаниялик футболчи "Барселона"га кетгани "Манчестер Сити"нинг режаларига жиддий таъсир кўрсатди. Клуб унинг ўрнини босиш учун "Лилл"нинг 18 ёшли аъзоси Айюб Буаддининг трансферини 85 миллион фунтга ҳал қилиш арафасида турибди. Бундан ташқари, "Рома" ҳамда Франсия терма жамоаси яримҳимоячиси Ману Коненинг трансфери масаласи кўриб чиқилмоқда. Гарчи янги харид қилинган Андерсон тажрибали футболчи ҳисобланса-да, 18 ёшли Буаддида юқори даражадаги ўйин амалиёти ҳали етарли эмас. Шу сабабли жамоага Коненинг тажрибаси асқотиши тайин. Опта нашри "Манчестер Сити"нинг чемпион бўлиш эҳтимолини 20 фоиз, деб баҳоламоқда.

**"Ливерпул" ва "Манчестер Юнайтед"даги Ўзгаришлар**

"Ливерпул" ҳам янги бош мураббий билан мавсумни бошлайди. Арне Слот ўрнини "Борнмут" билан муваффақиятли ишлаган Андони Ираола эгаллади. Бироқ мерсисайдликлар ёзги трансферлар вақтида жамоанинг бир нечта муҳим футболчилар тарк этди. Муҳаммад Салоҳ клубдаги узоқ йиллик фаолиятидан сўнг жамоадан кетди, Ибраҳима Конате эса Мадриднинг "Реал" клубига ўтди. "Ливерпул" уларнинг ўрнини тўлдиришга ҳаракат қилган бўлса-да, жамоа ўтган мавсумга нисбатан кучайгани борасида саволлар мавжуд. Шу сабабли кучли тўртлик учун кураш "қизиллар"нинг асосий мақсадларидан бири бўлиши мумкин. Мерсисайдликлар асосан ҳимоя чизиғига футболчилар олиб келди. "Ренн"дан 20 ёшли франсиялик Жереми Жаке ҳамда "Барселона" сардори Роналд Араухони ижарага олинди. Бундан ташқари, клуб Испаниянинг "Осасуна" клуби вингери Виктор Мунёзни сотиб олди. Ливерпуликлар Муҳаммад Салоҳнинг ўрнини босиш учун "ПСЖ" ҳужумчиси Бредли Барколя билан музокараларни давом эттирмоқда.

"Манчестер Юнайтед" эса Майкл Керрик бошқарувида мавсумни бошлайди. У жамоани 2026-йил январида қабул қилиб олган ва 17 та учрашувда атиги икки марта мағлубиятга учраб, "МЮ"ни учинчи ўринга ва Чемпионлар Лигасига олиб чиқди. Энди Керрик бу натижа тасодиф эмаслигини исботлаши керак. Ёзда "Манчестер Юнайтед" яримҳимояни кучайтирди. "Челси"дан Андре Сантос, "Астон Вилла"дан эса Юрий Тилеманс таркибга қўшилди. "Барселона"да ижара асосида ҳаракат қилган Маркус Решфорд жамоага қайтди. Шу билан бирга, Каземиро ва яна бир қатор футболчилар клубни тарк этди.

**"Астон Вилла" ва "Челси"нинг Амбициялари**

Унаи Эмери бошқарувидаги "Астон Вилла" энди топ-6 жамоаларига қарши курашадиган ауцайдер сифатида қаралмаяпти. Клубнинг Европа Лигасидаги ғалабаси унга Европа Чемпионлар Лигасида қатнашиш имконини берди. Бироқ Бирменгем жамоасининг муҳим футболчилари Тилеманс ва Морган Рожерс клубни тарк этди. Асосий посбон Эмилиано Мартинеснинг ҳам кетиш эҳтимоли юқори. Шу сабаб "Астон Вилла" "Парма" ва Япония терма жамоаси дарвозабони Зион Сузукини харид қилди. Чап қанот ҳимоясига "Атлетико Мадрид" футболчиси Матео Ружжери сотиб олинди. Опта "Вилла"нинг чемпионлик имкониятини 4,8 фоизга баҳоламоқда.

"Челси" эса Хаби Алонсо қўл остида янги даврни бошлайди. Испаниялик мураббий "Баер" билан Германия Бундеслигасини ютган. Қисқа вақт бўлса ҳам Мадриднинг "Реал" клубида фаолият олиб борди. Лондон клуби ёзда "Астон Вилла"дан Морган Рожерсни 138 миллион фунтга сотиб олди. Бундан ташқари, "Челси" таркибида тажрибали футболчилар сони ҳам ошди. 35 ёшли Денни Уелбек ва 36 ёшли Жордан Хендерсон каби футболчилар жамоага қўшилиб, ёш футболчиларга ёрдам бериши кутилмоқда. Опта "аристократлар"нинг чемпионлик имкониятини 3,7 фоизга баҳоламоқда.

**Лемпард АПЛда Кашфиёт Мураббийлардан Бири Бўлиши Мумкин**

Янги мавсумдаги энг қизиқарли жамоалардан бири — Френк Лемпард бошқарувидаги "Ковентри Сити". Собиқ "Челси" футболчиси 2024-йил ноябрида жамоани қабул қилиб олганида клуб Чемпионшип турнир жадвалининг 17-ўринида эди. Орадан бир ярим йил ўтиб, Лемпард "Ковентри"ни Англия футболининг элитаси — Премьер Лигага олиб чиқди. Лемпарднинг "Челси" ва "Эвертон"даги мураббийлик фаолияти кўплаб саволларни келтириб чиқарган бўлса-да, "Ковентри" жамоасини яхши шакллантира олди. У жамоада ҳужумкор футбол ва прагматик ёндашув ўртасида мувозанат яратди. Айниқса, стандарт вазиятлар "Ковентри"нинг кучли қуролига айланди: жамоа ўтган мавсумда стандартлардан 29 та гол уриб, бу борада лигада энг яхши натижани қайд этди. Қизиғи, "Ковентри" янги мавсумдаги илк учрашувини айнан чемпион "Арсенал"га қарши ўтказади. Бу Лемпард жамоаси учун жиддий синов бўлади. "Ковентри" 2001-йилдан буён илк бор Премьер Лигада иштирок этмоқда.

**"Ипсвич" ва "Ҳалл Сити"нинг АПЛда Омон Қолиш Учун Кураши**

"Ипсвич" ҳам АПЛга қайтди. Клуб 2024/2025-йилги мавсумда 19-ўринни эгаллаб, қуйи лигага тушиб кетганди. Ёзги трансферлар вақтида эса "Ипсвич" тарихидаги энг катта харажатларни амалга оширди — 12 нафардан ортиқ янги футболчи учун 178 миллион фунт сарфланди. Шунингдек, жамоа бош мураббийни ҳам алмаштирди. "Ипсвич"ни АПЛга олиб чиққан Кирен Маккенна мавсумлар оралиғида клубни тарк этди. Унинг ўрнига Гари ЎНил тайинланди. Янги мураббий, янги тактика ва янгиланган таркиб жамоанинг келаси мавсумдаги имкониятларини олдиндан баҳолашни қийинлаштирмоқда.

"Ҳалл Сити" эса тўққиз йиллик танаффусдан сўнг Премьер Лигага қайтди. Клуб плей-офф финалида "Мидлсбро"ни 1:0 ҳисобида мағлуб этиб, элитага йўлланма олди. Бироқ жамоанинг молиявий имкониятлари чекланган. Трансфермаркт порталига кўра, "Ҳалл Сити" таркибининг умумий қиймати 144 миллион еврони ташкил этади ва бу АПЛдаги энг паст кўрсаткич. Шу сабабли жамоани мавсум давомида омон қолиш учун ҳаракат қилиши кутилмоқда.

**Энг Олдиндан Айтиб Бўлмайдиган Лига**

АПЛнинг қолган жамоалари ҳам янги мавсумда кутилмаган натижалар қайд этиши мумкин. "Тоттенҳем" ўз тарихидаги энг ёмон мавсумлардан биридан кейин Роберто де Зерби бошқарувида тикланишга ҳаракат қилади. Италиялик мутахассис жамоа яримҳимоясини кучайтирди. "Нюкасл"дан Сандро Тонали ҳамда "Вест Ҳем"дан Матеуш Фернандеш клуб сафига қўшилди. Жамоанинг асосий ҳимоячиси ва сардори Кристиан Ромеро "шпорлар"ни тарк этгач, унинг ўрнини "Брайтон" ва Нидерландия ҳимоячиси Ян ван Ҳекке билан тўлдирди. "Ливерпул"нинг тажрибали латерали Эндрю Роберцон ҳам эркин агент сифатида жамоага келди. Де Зербининг бундай катта трансферлардан сўнг клубни яна юқори ўринларга олиб чиқиш вазифаси турибди.

Конференсиялар Лигасининг амалдаги ғолиби "Кристал Пелас" эса Европада ўзини кўрсатган бўлса-да, ўтган мавсум АПЛни атиги 15-ўринда якунлаган. "Нюкасл" Эдди Хау кетганидан кейин янги даврни бошлайди. "Борнмут" эса Марко Розе бошқарувида Премьер Лигада ўз ўрнини сақлаб қолишга уринади.

Шу сабабли 2026/27-йилги АПЛ мавсумида аниқ фаворитларни белгилаш қийин. Чемпионлик учун кураш, Еврокубоклар йўлланмаси ва лигадаги ўринларни сақлаб қолиш учун жанг бир-биридан кам бўлмаган даражада қизиқарли кечиши кутилмоқда. Айнан ўртамиёна жамоалар орасидаги кескин кураш ва кутилмаган натижалар Англия чемпионатини дунёнинг энг рақобатли лигаларидан бирига айлантиради.