“Реал” учун ёзги трансферлар ойнаси якунлади
"Реал" учун ёзги трансферлар ойнаси якунланди
Мадриднинг "Реал" клуби жорий ёзги трансфер ойнасида бошқа футболчи сотиб олмайди. Испаниянинг Марса нашри хабарига кўра, эндиликда "қироллик клуби" раҳбарияти бор эътиборини мураббийлар штаби режасига кирмаган футболчиларни сотиш ва улар билан хайрлашишга қаратади.
Германиянинг "РБ Лейпсиг" жамоасидан 125 миллион евро (қўшимча бонусларсиз) эвазига харид қилинган вингер Ян Диоманде мадридликларнинг жорий мавсумдаги сўнгги йирик трансфери бўлди. Раҳбариятнинг фикрича, ушбу трансфердан сўнг Жозе Моуринё бощлигидаги жамоанинг таркиби 95 фоизга шаклланиб бўлган. Янги ўйинчиларнинг харид қилиниши энди фақат фавқулодда ҳолатларда — жамоа етакчиларидан бири кутилмаганда сотиб юборилса ёки кимдир жиддий жароҳат олган тақдирдагина амалга оширилиши мумкин.
Таъкидлаш жоизки, Мадрид гранди бу ёзда таркибни жиддий равишда янгилаб, кенг кўламли трансферларни амалга оширди. Хусусан, жамоа сафига Диомандедан ташқари Марк Кукуреля, Дензел Дюмфрис, Иброҳим Конате, Бернарду Силва ва Карлос Эспи каби номдор футболчилар келиб қўшилди. Бошқа томондан эса, жамоанинг тажрибали футболчилари Давид Алаба ва Даниел Карвахал, шунингдек, Дани Себалёс, Фран Гарсия, Гонсало Гарсия, Сесар Паласиос, Марио Мартин ҳамда Фран Гонсалес каби қатор ўйинчилар клубни тарк этди. Франко Мастантуоно эса доимий ўйин амалиётига эга бўлиш мақсадида бошқа жамоага ижарага берилди.